काठमाडौं । आईसीसी टी–ट्वान्टी पुरुष विश्वकप क्रिकेट अन्तर्गत आयोजक अष्ट्रेलियाले जित निकालेको छ । एडिलेटमा शुक्रबार भएको खेलमा अष्ट्रेलियाले अफगानिस्तानलाई ४ रनले हराएको हो ।
अष्ट्रेलियाले दिएको १ सय ६९ रनको लक्ष्य पछ्याएको अफगानिस्तानले २० ओभरमा ७ विकेट गुमाएर १ सय ६४ रन मात्र बनाउन सक्यो ।
अफगानिस्तानका लागि राशिद खानले अविजित रहदै ४८ रन बनाए । यस्तै, गुल्बादिन नाइबले ३९ रन जोड्दा रहमानउल्लाह गुरुबाजले ३० रन जोडे भने इब्राहिम जाड्रनले २६ तथा डार्विस रसोलले १५ रन जोडे ।
अष्ट्रेलियाका जोश हाजलउड र एडम जाम्पाले २–२ विकेट लिए । त्यसअघि पहिले ब्याटिङ गरेको अष्ट्रेलियाले २० ओभरमा ८ विकेट गुमाएर १ सय ६८ रन बनायो ।
अष्ट्रेलियाका लागि ग्लेन म्याक्स्वेलले अविजित रहदै ५४ रनको अर्धशतकीय पारी खेले । यस्तै, मिचेल मार्शले ४५ रन जोड्दा मार्कुस स्टोईनिस र डेभिड वार्नरले समान २५–२५ रन बनाए ।
अफगानिस्तानका लागि नभिन उल हकले ३ विकेट लिए भने फजलहक फारुकीले २ विकेट लिए । जितसँगै अष्ट्रेलियाले सेमिफाइनलमा पुग्ने सम्भावना कायम राखेको छ ।
यद्यपि, अष्ट्रेलियाको सेमिफाइनल यात्रा श्रीलंका र इंग्ल्यान्डबीचको खेलमा निर्भर रहनेछ । समूह १ मा रहेको अष्ट्रेलियाले ५ खेलमा ७ अंक जोडेको छ । अष्ट्रेलिया समूहको दोस्रो स्थानमा उक्लिएको छ ।
