काठमाडौं । कोभिड–१९ को जोखिम बढेसँगै अन्य प्रकृतिका बिरामी रोग पालेर बस्न बाध्य भएका छन् । गम्भीर प्रकृतिका रोग लागेका बिरामीका लागि अस्पतालको आकस्मिक सेवा खुले पनि उपचार नपाउँदा रोग पालेर बस्न बाध्य हुनु परेको छ । सरकारले ओपीडी सेवा बन्द नगर्न पत्राचार गरे पनि अहिले अधिकांश अस्पतालका ओपीडी सेवा बन्द छन् । निजी अस्पतालले सहज तरिकाले सेवा दिएका छैनन् ।मुख्यतः दीर्घ तथा विभिन्न प्रकृतिका रोगले ग्रसित बिरामीको नियमित चेकजाँचमा सकस भएको छ । यस्तै, मुटु रोगी, दम, मधुमेह, क्यान्सर र मिर्गौलापीडित मारमा परेका छन् । कोभिड–१९ संक्रमणको जोखिम बढ्नुअघि सबैभन्दा पुरानो अस्पताल वीर अस्पतालमा दैनिक १ हजार बढी बिरामी आउँथे । त्रिवि शिक्षण अस्पतालमा दैनिक १ हजार २ सय बढी बिरामी उपचारका लागि आउने गरेका थिए । तर, हाल त्रिवि शिक्षण अस्पतालमै संक्रमण पुष्टि भएपछि अस्पतालमा स्वास्थ्य सेवा आंशिक रूपमा प्रभावित भएको छ ।

यस्तै, जिल्लाका अधिकांश सरकारी तथा निजी अस्पतालले सेवाप्रवाह नगरेको बिरामीबाट गुनासो आउन थालेको छ । सरकारले सबै अस्पतालको सेवा बन्द नगर्न आग्रह गर्दै आए पनि कार्यान्वयनमा आउन सकेको छैन । जसकारण, बिरामी घरमै रोग पालेर बस्न विवश छन् । सरकारले बिरामीका लागि ठोस कार्ययोजना बनाउन सकेको छैन । काठमाडौं उपत्यकाका ठूला अस्पताल र जिल्लामा रहेका अस्पतालले स्वास्थ्य सेवा सहज ढंगले प्रवाह नगरेको पाइएको छ । बिरामीलाई अस्पतालसम्म पुग्नै समस्या छ भने अस्पताल पुगे पनि सेवा सजिलैसँग पाउन नसकेको गुनासो गर्न थालेका छन् ।

धादिङबेंसी घर भएका हरि लम्साल एक्कासि मुटु दुखेपछि काठमाडौं पुगे । तर, अधिकांश अस्पताल चाहर्दा सेवा पाउन सकेनन् । यस्तै, नियमित मिर्गौला डायलायसिस गर्दै आएकाहरु पनि समस्यामा परेका छन् । प्यूठानकी ४५ वर्षीया तारा बस्नेतले भनिन्, ‘ममा एकदमै मुटु दुख्ने समस्या छ । काठमाडौंमा अस्पताल खुल्दैन होला । आए पनि सजिलै सेवा पाइँदैन होला ।’ स्वास्थ्य तथा जनसंख्या मन्त्रालयका सहप्रवक्ता डा। समीर अधिकारीले अस्पतालले ओपीडी सेवा बन्द गर्न नमिल्ने बताए । उनले भने, ‘कुनै पनि बिरामीको उपचार रोकिनुहुँदैन । ओपीडी सेवा निरन्तर सञ्चालन गर्नुपर्छ ।’ चिकित्सकले स्वास्थ्यजन्य सामग्री पर्याप्त नहुँदा सेवा दिन अप्ठेरो भएको गुनासो गरेका छन् । राजधानी दैनिक