लुम्बिनी । नेकपा माओवादी केन्द्रले लुम्बिनी प्रदेशका दुई सांसदलाई कारबाही गर्ने भएको छ । माओवादी केन्द्र छाडेर एमालेमा प्रवेश गरेका लुम्बिनी प्रदेशका सांसदद्वय दधिराम न्यौपाने र दिनेश पन्थीलाई पार्टीले कारबाही गर्ने भएको हो ।
सांसद न्यौपाने रुपन्देहीका हुन् भने पन्थी गुल्मीका हुन् । एमाले र माओवादी केन्द्र ब्युँतिएपछि उनीहरुले एमाले प्रवेश गरेका थिए ।
उनीहरुलाई पार्टीले कारबाही गरेको खण्डमा सांसद पद खारेज हुनेछ । यता पार्टीले २४ घण्टे स्पष्टीकरण सोधेको भए पनि एक हप्ता बितिसक्दा पनि सांसदद्वयले स्पष्टीकरणको जवाफ नदिएपछि कारबाही गर्न लागेको हो ।
यस्तै प्रदेशमा माओवादी केन्द्रले मुख्यमन्त्री मुख्यमन्त्री शंकर पोखरेललाई दिएको समर्थन फिर्ता गर्ने पनि तयारी थालेको बताइएको छ । माओवादी केन्द्रको समर्थन गुमाएपछि मुख्यमन्त्री पोखरेलले बहुमत गुमाउनेछन् । लुम्बिनी प्रदेशसभामा एमालेसँग ४१ सीट रहँदा माओवादी केन्द्रका २० सांसद रहेका छन् ।
गत फागुन २३ गते सर्वोच्च अदालतले ऋषि कट्टेल नेतृत्वको नेपाल कम्युनिस्ट पार्टीको पक्षमा फैसला गरेलगत्तै नेपाल कम्युनिस्ट पार्टी (एमाले) र माओवादी केन्द्र ब्युँतिएका हुन् ।
