काठमाडौं । नेपाली कांग्रेसको १५औँ महाधिवेशनअन्तर्गत नयाँ केन्द्रीय कार्यसमिति चयनका लागि भइरहेको मतगणनाको सम्पूर्ण परिणाम आज रातिसम्म सार्वजनिक हुने भएको छ।
निर्वाचन समितिका सदस्यसचिव राजु कटुवालका अनुसार केन्द्रीय सदस्यका बाँकी पदको मतगणना सम्पन्न गरी आज रातिसम्म सबै पदको अन्तिम परिणाम सार्वजनिक गर्ने तयारी गरिएको छ।
कांग्रेसको नयाँ नेतृत्व चयनका लागि सभापति, उपसभापति, महामन्त्री र सहमहामन्त्री पदको मतगणना सम्पन्न भइसकेको छ। अहिले केन्द्रीय सदस्यका विभिन्न समूहको मतगणना जारी छ। खुला, महिला, प्रदेशगत तथा समावेशीलगायत समूहका उम्मेदवारको मतगणना भइरहेको निर्वाचन समितिले जनाएको छ।
सभापतिमा गगनकुमार थापा निर्वाचित भइसकेका छन्। उनले ६ हजार ५८४ मत प्राप्त गर्दा उनका प्रतिस्पर्धी श्यामकृष्ण खड्गीले ३७५ मत पाएका थिए। सभापति पदको निर्वाचनमा कुल ७ हजार १३ मत खसेको थियो।
त्यस्तै, उपसभापतिमा चन्द्रकान्त भण्डारी, मधु आचार्य र विनोदकुमार चौधरी निर्वाचित भएका छन्। महामन्त्रीमा प्रदीप पौडेल, उदयशमशेर राणा र डिला संग्रौला निर्वाचित भएका छन्। सहमहामन्त्रीका विभिन्न समूहको मतपरिणाम पनि सार्वजनिक भइसकेको छ। खुला सहमहामन्त्रीतर्फ अजयबाबु शिवाकोटी र रामहरि खतिवडा निर्वाचित भएका छन्।
केन्द्रीय सदस्यतर्फ भने मतगणना जारी रहेकाले सबै पदको अन्तिम परिणाम आउन बाँकी छ। खुला केन्द्रीय सदस्यका ४५ पदका लागि प्रतिस्पर्धा भइरहेको छ। उम्मेदवारको संख्या धेरै हुनुका साथै ठूलो संख्यामा मतपत्र गणना गर्नुपर्ने भएकाले अन्तिम परिणाम सार्वजनिक गर्न समय लागेको हो।
निर्वाचन समितिले पार्टीको केन्द्रीय कार्यालय सानेपामा विभिन्न समूह बनाएर मतगणना गरिरहेको छ। बाँकी समूहको मतगणना सकेर आज रातिसम्म सबै पदको परिणाम सार्वजनिक गर्ने लक्ष्य राखिएको छ।
सम्पूर्ण मतपरिणाम सार्वजनिक भएपछि कांग्रेसको १५औँ महाधिवेशनबाट निर्वाचित नयाँ केन्द्रीय कार्यसमितिको पूर्ण संरचना टुंगो लाग्नेछ।
