काठमाडौं । आन्तरिक राजस्व विभागले सञ्चालन गर्दै आएको करदाता प्रोत्साहन उपहार कार्यक्रममा सहभागी हुन खरिद बिलको विवरण प्रविष्ट गर्ने अन्तिम मिति असोज ३१ गते तोकिएको छ।

विभागका अनुसार २०८३ असोज १६ देखि ३१ गतेसम्मको अवधिमा नगद भुक्तानी गरी वस्तु तथा सेवा खरिद गर्ने उपभोक्ताले उक्त अवधिको खरिद बिलको विवरण अनलाइन प्रणालीमा प्रविष्ट गरी उपहार कुपन प्राप्त गर्न सक्नेछन्।

उक्त अवधिका लागि प्राप्त उपहार कुपन आगामी कात्तिक १ गते खोलिने र विजेता घोषणा गरिने विभागले जनाएको छ। कार्यक्रममा सहभागी हुन उपभोक्ताले असोज ३१ गते शनिबारभित्र https://prize.ird.gov.np/ मा गई खरिद बिलको विवरण प्रविष्ट गर्नुपर्नेछ।

पुरस्कार प्राप्त गर्न खरिद बिल अनिवार्य हुने भएकाले वस्तु तथा सेवा खरिद गर्दा अनिवार्य रूपमा बिल लिन विभागले उपभोक्तालाई आग्रह गरेको छ। त्यस्तै, वस्तु तथा सेवा बिक्री गर्दा अनिवार्य रूपमा बिक्री बिल वा बीजक जारी गर्न विभागले सबै व्यवसायीलाई अनुरोध गरेको छ।

विभागले कर प्रणालीमा पारदर्शिता बढाउन, बिल लिने र दिने संस्कृतिको विकास गर्न तथा उपभोक्तालाई करप्रति सचेत गराउने उद्देश्यले पाक्षिक रूपमा करदाता प्रोत्साहन उपहार कार्यक्रम सञ्चालन गर्दै आएको छ।