काठमाडौं । नेपाली बजारमा सुनकोमूल्य घट्ने क्रम जारी रहँदा पछिल्लो चार दिनमा प्रतितोला ८ हजार १०० रुपैयाँले घटेको छ।
नेपाल सुनचाँदी व्यवसायी महासंघका अनुसार गत आइतबार प्रतितोला २ लाख ९६ हजार ५०० रुपैयाँमा कारोबार भएको सुनको मूल्य बिहीबार घटेर २ लाख ८८ हजार ४०० रुपैयाँ कायम भएको छ।
बिहीबार मात्रै सुनको मूल्य प्रतितोला १ हजार १०० रुपैयाँले घटेको हो। बुधबार सुन प्रतितोला २ लाख ८९ हजार ५०० रुपैयाँमा कारोबार भएको थियो।
सुनसँगै चाँदीको मूल्यमा पनि गिरावट आएको छ। बिहीबार चाँदीको मूल्य प्रतितोला २२० रुपैयाँले घटेर ४ हजार ३५ रुपैयाँ कायम भएको महासंघले जनाएको छ। बुधबार चाँदी प्रतितोला ४ हजार २५५ रुपैयाँमा कारोबार भएको थियो।
गत आइतबार प्रतितोला ४ हजार ४४० रुपैयाँ रहेको चाँदीको मूल्य पनि चार दिनको अवधिमा ४०५ रुपैयाँले घटेको छ।
