एजेन्सी । च्याम्पियन्स लिगको समूह चरणको खेलमा इंग्लिस क्लब म्यानचेष्टर युनाइटेडले स्पेनिस क्लब भिल्लारियललाई पराजित गरेको छ ।
भिल्लारियलविरुद्धको खेलमा पछि परेको युनाइटेडले उत्कृष्ट पूनरागमनका साथ २–१ ले खेल आफ्नो पक्षमा पारेको हो ।
क्रिस्टियानो रोनाल्डोले कीर्तिमानी खेलको इन्जुरी समयमा गोल गर्दै युनाइटेडलाई जित दिलाएका हुन् ।
च्याम्पियन्स लिगमा रियल म्याड्रिडका पूर्व कप्तान इकर कासिलासको १ सय ७७ खेलको कीर्तिमानलाई भंग गरेका रोनाल्डोले खेल सकिनै लाग्दा इन्जुरी समयको अन्तिम मिनेटमा गोल गरे ।
खेलको ५३ औं मिनेटमा पाको अल्कासरको गोलमा भिल्लारियलले सुरुवाती अग्रता लिएको थियो । एलेक्स टेलेसले ६० औं मिनेटमा गोल गर्दै युनाइटेडलाई बराबरीमा ल्याएका थिए ।
समूह चरणको दोस्रो खेलमा युनाइटेडको यो पहिलो जित रहेको छ । समूह एफमा एट्लान्टाको ४ अंक रहँदा योङ ब्वाइज र युनाइटेडको समान ३ अंक छ । यस्तै १ अंक जोडेको भिल्लारियल समूहको पुछारमा छ ।
