काठमाडौं, असोज १९ गते । नेपाल–क्यानडा द्विपक्षीय परामर्श संयन्त्रको बैठक क्यानडाको ओट्टावास्थित विदेश मामिला, व्यापार तथा विकास विभागमा बिहीबार बस्यो ।
बैठकमा नेपाली प्रतिनिधिमण्डलको नेतृत्व परराष्ट्र सचिव शंकर दास बैरागीले गर्नुभएको थियो । क्यानडाका तर्फबाट विश्व मामिलासम्बन्धी सहायक विदेशमन्त्री डा. डोनाल्ड बोबियासले प्रतिनिधिमण्डलको नेतृत्व गर्नुभएको थियो ।
दुवै पक्षबीच नेपाल र क्यानडाबीचको द्विपक्षीय सम्बन्धको पछिल्लो अवस्थाका बारेमा समीक्षा गरिएको क्यानडास्थित नेपाली राजदूतावासले जनाएको छ । बैठकमा व्यापार, लगानी, पर्यटन, कृषि, आप्रवासन, शिक्षा, जलवायू परिवर्तन, प्रविधि हस्तान्तरण तथा भिसा र कन्सुलर सेवा समेतका विविध क्षेत्रमा सहयोगलाई थप सुदृढ गर्ने विषयमा छलफल भएको थियो ।
त्यस अवसरमा नेपाली प्रतिनिधिमण्डलले नेपाल सरकारका विकास प्राथमिकताका क्षेत्रका बारेमा जानकारी गराएको थियो । जवाफमा क्यानेडेली प्रतिनिधिमण्डलले आर्थिक साझेदारीमा बढोत्तरीका साथै नेपालको विकास प्रयासमा सहयोग गर्न तत्पर रहेको जनाएको थियो ।
बैठकमा क्यानडाका लागि नेपाली राजदूत कालीप्रसाद पोखरेल, सहसचिव घनश्याम भण्डारी, दूतावासका काउन्सिलर प्रकाश अधिकारी लगायतको सहभागिता थियो ।
यही सेप्टेम्बर २४, २०१८ मा नेपालका प्रधानमन्त्री केपी शर्मा ओली र क्यानडाका प्रधानमन्त्री जस्टिन ट्रुडोबीच न्यूयोर्कमा द्वीपक्षीय परामर्श संयन्त्र निर्माण गर्ने सम्बन्धी समझदारी पत्रमा हस्ताक्षर भएको थियो ।
संयन्त्रको अर्को बैठक काठमाडौंमा बस्ने दूतावासले जनाएको छ ।
