काठमाडौँ । नेकपा एमालेले बागमती प्रदेशको नयाँ मुख्यमन्त्रीका रूपमा भक्तपुरका सांसद किरण थापालाई अघि बढाउने गरी सहमति जुटाएको छ ।
मङ्गलबार पार्टी केन्द्रीय सचिव महेश बस्नेत, राजन भट्टराईलगायत नेताहरूबीच भएको छलफलपछि थापालाई मुख्यमन्त्री बनाउने सहमति भएको हाे ।
सहमति अनुसार बागमती प्रदेशमा एमाले संसदीय दलको नेताको जिम्मेवारी भने जगन्नाथ थपलियाले नै सम्हाल्नेछन् । मुख्यमन्त्रीका रूपमा थापालाई अघि बढाउने र दलको नेता थपलियालाई कायमै राख्ने गरी नेतृत्व तहमा समझदारी भएको हो ।
यसअघि थपलियाविरुद्ध प्रदेश सभामा अविश्वास प्रस्ताव दर्ता भएको थियो । पछिल्लो सहमतिपछि एमाले बागमती प्रदेश संसदीय दलको बैठक हेटौँडामा बसेर थापालाई मुख्यमन्त्रीका रूपमा औपचारिक रूपमा अघि बढाउने निर्णय गरेको छ ।
दलभित्रको विवाद समाधान गर्दै नयाँ मुख्यमन्त्री चयनको प्रक्रिया अघि बढाउने एमालेको तयारीसँगै बागमती प्रदेशको राजनीतिक समीकरणमा समेत नयाँ मोड आएको छ ।
