मेलबर्न ।अस्ट्रेलियन ट्रेड युनियन परिषद्ले बुधबार विहान मेलबर्न सहरमा ‘चेन्ज द रुल्स’ नामक बृहत र्याली प्रदर्शन गरिएको छ । तलब र भत्तामा वृद्धि हुनुपर्ने माग गर्दै सुरु भएको र्यालीमा ५० हजार जनाको सहभागिता रहेको एसबीएसले उल्लेख गरेको छ ।
बिहान १०ः ३० बजे सुरु भएको उक्त र्यालीका कारण सहरका मुख्य सडकहरू अवरुद्ध भएको थियो ।
र्यालीमा भिक्टोरियाका प्रिमियर ड्यानियल एण्ड्रुजलगायत वाम धारका सङ्घीय सांसदहरू एन्ड्रु जाइल्स, जेड कार्नी, केट थ्वेट्स र एडम बाण्टको पनि सहभागिता रहेको थियो ।
कामदारहरूले आफ्नो काम बापत यथोचित पारिश्रमिक तथा भत्ता पाउनु पर्ने भन्दै भिक्टोरियाली प्रिमियरले उक्त र्यालीमा भाग लिएका थिए।
अस्ट्रेलियाका विभिन्न युनियनहरूका अनुसार, लिबरल र नेस्नल पार्टीको गठबन्धन सरकारमा आएपछि अस्ट्रेलियनहरुको जीवनस्तरमा ३० वर्ष यताकै सबैभन्दा बढी गिरावट भएको छ।
र्याली सहरको केन्द्रीय व्यापारिक क्षेत्रमा रहेको ट्रेड्स हलबाट सुरु भइ सप्रिंग स्ट्रिटस्थित राज्यको संसद् भवन पुगेर समापन भएको थियो ।
