जनकपुरधाम । नेपालीहरूको महान् चाड विजयादशमी नजिकिएसँगै मिथिलाको सांस्कृतिक केन्द्र जनकपुरधाममा दशैँको तयारी तीव्र पारिएको छ ।
जनकपुरधामका प्रमुख शक्तिपीठ राजदेवी मन्दिरसहित दर्जनौँ स्थानमा देवी दुर्गाको मूर्ति स्थापना गरी भव्य पूजाअर्चना गर्ने तयारी भइरहेको छ । यसवर्षको दशैँलाई विशेष बनाउन स्थानीय युवा क्लबहरू सक्रिय रूपमा जुटेका छन् ।
राजा जनककी कुलदेवीका रूपमा प्रसिद्ध राजदेवी मन्दिर परिसरमा पूजाको व्यवस्थापनका लागि महावीर युवा कमिटीले १६ वटा विभिन्न समिति तथा उपसमिति गठन गरी काम गरिरहेको छ । कमिटीका अध्यक्ष दीपककुमार साहका अनुसार अघिल्ला वर्षहरूको तुलनामा यसवर्ष दशैँलाई थप भव्य र व्यवस्थित बनाउने लक्ष्य राखिएको छ ।
राजदेवी मन्दिर परिसरमा आकर्षक पण्डाल निर्माण तथा विद्युतीय सजावटको काम अन्तिम चरणमा पुगेको छ । पूजास्थलको व्यवस्थापन, श्रद्धालुको सहज आवागमन तथा अन्य आवश्यक तयारीलाई समेत प्राथमिकताका साथ अघि बढाइएको छ ।
त्यस्तै, राम युवा कमिटीले बौद्धी माता र अमरखाना माइ मन्दिरमा पूजाको तयारी थालेको छ । कमिटीका अध्यक्ष विजय साहले धार्मिक अनुष्ठानसँगै दशैँलाई व्यवस्थित बनाउन सरसफाइ तथा व्यवस्थापकीय पक्षमा विशेष ध्यान दिइएको जानकारी दिनुभयो ।
जनकपुरधामका राजदेवी र राम मन्दिरमा मात्रै नभई विद्यापति चोक, भ्रमरपुरा चोक, पिडडिया माइस्थान, रजौललगायतका स्थानमा समेत स्थानीय युवा क्लबहरूले दुर्गा भवानीको मूर्ति स्थापना गरी पूजाको तयारी गरिरहेका छन् ।
दशैँलाई लक्षित गर्दै मन्दिर तथा पूजा स्थलहरूमा रंगीचंगी बत्ती र कलात्मक पण्डाल निर्माणको काम भइरहेकाले जनकपुरधाममा चाडपर्वको उत्साहपूर्ण वातावरण देखिन थालेको छ । स्थानीय युवा क्लब तथा समितिहरूले पूजालाई व्यवस्थित र भव्य बनाउन आवश्यक तयारीलाई तीव्रता दिएका छन् ।
