काठमाडौं । नेपाली कांग्रेसका सहमहामन्त्री फरमुल्लाह मन्सुरले सभापति गगनकुमार थापाको नेतृत्वमा कांग्रेस रूपान्तरण भएको दाबी गर्नुभएको छ।
नेपाल तरुण दलले आयोजना गरेको कार्यक्रममा बोल्दै मन्सुरले भदौ २३–२४ पछि पार्टीभित्र र जनतामा देखिएको निराशा तथा आक्रोशलाई सम्बोधन गर्न कांग्रेस नयाँ नीति र नेतृत्वका साथ अघि बढेको बताउनुभयो।
उहाँले आफूले नै केन्द्रीय कार्यसमितिमा गगन थापालाई प्रधानमन्त्री र पार्टी सभापतिको ‘फेस’ बनाएर कांग्रेसलाई जनतामाझ लैजानुपर्ने प्रस्ताव राखेको स्मरण गर्नुभयो।
मन्सुरले १५औँ महाधिवेशनबाट निर्वाचित कार्यसमितिले सभापति थापालाई कांग्रेसको भरोसायोग्य नेता र पार्टीलाई भरोसायोग्य राजनीतिक शक्तिका रूपमा स्थापित गरेको दाबी गर्नुभयो। सभापति थापाले अघि सारेका एजेण्डालाई कार्यान्वयन गर्दै कांग्रेसले खोजेको रूपान्तरणलाई संस्थागत गर्न आफ्नो भूमिका महत्वपूर्ण हुने उहाँको भनाइ छ।
‘भदौ २३–२४ पछि जनताको बीचमा र नेपाली कांग्रेसको बीचमा निराशा र आक्रोशको अवस्था थियो। त्यो बेला नेपाली कांग्रेसले नयाँ नीति र नयाँ नेता लिएर जनताको बीचमा जानुपर्छ र गगन थापालाई प्रधानमन्त्री र सभापतिको फेस बनाएर जानुपर्छ भनेर मैले केन्द्रीय कार्यसमितिमा कुरा राखेको थिएँ,’ मन्सुरले भन्नुभयो।
उहाँले देशभरका कांग्रेस कार्यकर्ताको मनमा समेत त्यही भावना रहेको र त्यसले व्यापक रूप लिएर विशेष महाधिवेशनमार्फत कांग्रेस रूपान्तरित भएको दाबी गर्नुभयो। ‘विशेष महाधिवेशनबाट कांग्रेस रूपान्तरित भयो, कांग्रेसमा नयाँ विचारको स्थापना भयो। त्यसको अभियन्ताका रूपमा पनि म यहाँ तपाईंहरूको बीचमा उपस्थित भएको छु,’ उहाँले भन्नुभयो।
मन्सुरले आफू कांग्रेसप्रति इमान्दारीपूर्वक समर्पित भएर राजनीतिमा सक्रिय रहेको बताउँदै १५औँ महाधिवेशनबाट ल्याइएका कार्यक्रम तथा नीतिलाई कार्यान्वयन गर्न आफ्नो महत्वपूर्ण भूमिका रहने बताउनुभयो।
पार्टीले अघि सारेका नीति तथा कार्यक्रम कार्यान्वयनमा योगदान गर्ने उद्देश्यले आफूले १५औँ महाधिवेशनमा उपसभापति पदका लागि समावेशी समूहबाट उम्मेदवारी दिएको पनि उहाँले स्पष्ट पार्नुभयो।
