काठमाडौं । देशका ७४ जिल्लामा स्क्रब टाइफस संक्रमण देखिएपछि स्वास्थ्य तथा खाद्य स्वच्छता मन्त्रालयले रोगको निगरानी, परीक्षण, उपचार तथा रोकथामका गतिविधिलाई तीव्र बनाएको छ।
इपिडेमियोलोजी तथा रोग नियन्त्रण महाशाखाका अनुसार सन् २०२६ को जनवरीदेखि हालसम्म ७४ जिल्लाबाट १० हजार २१० जना स्क्रब टाइफस संक्रमित भएको विवरण प्राप्त भएको छ। संक्रमितमध्ये सात जनाको मृत्यु भएको महाशाखाले भेरिफिकेसन गरेको जनाएको छ।
संक्रमणको अवस्था बढ्दै गएपछि मन्त्रालयअन्तर्गतको इपिडेमियोलोजी तथा रोग नियन्त्रण महाशाखाले असारदेखि नै सातै प्रदेशका सबै जिल्लाका साथै जोखिममा रहेका केही स्थानीय तहका प्रमुख र प्रदेश सचिवसँग स्क्रब टाइफस रोकथाम तथा नियन्त्रणका विषयमा समन्वय र छलफल गर्दै आएको छ।
मन्त्रालयले संक्रमणको अवस्था र प्रवृत्तिको नियमित निगरानीका लागि Early Warning and Reporting System (EWARS) तथा Surveillance Outbreak Response Management and Analysis System (SORMAS) लगायतका रोग निगरानी प्रणालीमार्फत अनुगमन गरिरहेको छ।
संक्रमणको जोखिम बढी देखिएका क्षेत्रमा परीक्षण र उपचारका लागि आवश्यक सामग्री तथा औषधिको उपलब्धता सुनिश्चित गरिएको मन्त्रालयले जनाएको छ। स्क्रब टाइफस परीक्षणका लागि आवश्यक द्रुत परीक्षण किट प्रदेश तथा स्थानीय तहमा आवश्यकताका आधारमा पठाइएको छ भने स्वास्थ्य सेवा विभागको व्यवस्थापन महाशाखामा पाँच हजार परीक्षण किट बफर स्टकमा राखिएको छ।
त्यस्तै, संक्रमण देखिएका क्षेत्रमा उपचारका लागि आवश्यक एन्टिबायोटिकलगायत औषधि उपलब्ध गराइएको छ। रोगको समयमै पहिचान र प्रभावकारी उपचारका लागि स्वास्थ्यकर्मीको क्षमता अभिवृद्धिलाई समेत मन्त्रालयले प्राथमिकता दिएको छ।
महाशाखाका अनुसार स्क्रब टाइफसको निदान तथा केस व्यवस्थापनसम्बन्धी भर्चुअल तथा प्रत्यक्ष तालिम र अभिमुखीकरण सञ्चालन भइरहेका छन्। असार महिनामा मात्रै करिब एक हजार चिकित्सक तथा स्वास्थ्यकर्मीलाई तालिम तथा अभिमुखीकरण दिइएको छ।
मन्त्रालयले रोगसम्बन्धी जनचेतना अभिवृद्धिका लागि राष्ट्रिय स्वास्थ्य शिक्षा, सूचना तथा सञ्चार केन्द्रमार्फत स्क्रब टाइफस रोकथाम तथा नियन्त्रणसम्बन्धी स्वास्थ्य शिक्षा सामग्रीसमेत प्रसारण गरिरहेको जनाएको छ।
संक्रमण बढी देखिएका क्षेत्रमा नियमित निगरानी, परीक्षण तथा उपचारको पहुँच विस्तार, स्वास्थ्यकर्मी परिचालन र स्थानीय तहसँगको समन्वयलाई थप प्रभावकारी बनाउँदै स्क्रब टाइफस नियन्त्रणका गतिविधिलाई निरन्तरता दिइएको मन्त्रालयले जनाएको छ।
