काठमाडौं । बागमती प्रदेशका नवनियुक्त मुख्यमन्त्री किरण थापा मगरले पद तथा गोपनीयताको शपथ ग्रहण गरेका छन्।
नेपालको संविधानको धारा १६८ को उपधारा २ बमोजिम सरकारको नेतृत्व गर्ने गरी नियुक्त भएका थापालाई प्रदेश प्रमुख दीपक प्रसाद देवकोटाले पद तथा गोपनीयताको शपथ गराएका हुन्।
एमाले, नेकपा र राष्ट्रिय प्रजातन्त्र पार्टी (राप्रपा)को समर्थनमा मुख्यमन्त्री नियुक्त भएका थापाले ६३ सांसदको समर्थनसहित सरकार गठनका लागि दाबी पेस गरेका थिए। उनको पक्षमा एमालेका २५, नेकपाका २६ र राप्रपाका १२ सांसदको समर्थन रहेको बताइएको छ।
तर, थापालाई समर्थन गर्ने विषयमा राप्रपाभित्रै विवाद देखिएको छ। राप्रपाका १२ सांसदले समर्थन गरेको दाबीका विषयमा पार्टीभित्र विवाद भइरहेका बेला थापा मुख्यमन्त्री नियुक्त भएका हुन्।
राप्रपाभित्रको विवादका बाबजुद प्रदेश प्रमुख देवकोटाले थापालाई मुख्यमन्त्री नियुक्त गरेपछि उनले बिहीबार पद तथा गोपनीयताको शपथ लिएका हुन्।
