काठमाडौँ। श्रम संस्कृति पार्टीका अध्यक्ष हर्कराज राईले अख्तियार दुरुपयोग अनुसन्धान आयोगको क्षेत्राधिकार, निष्पक्षता र कार्यशैलीमाथि गम्भीर प्रश्न उठाउनुभएको छ ।
बिहीवार सिंहदरबारमा आयोजित राज्य व्यवस्था तथा सुशासन समितिको बैठकमा बोल्दै अध्यक्ष राईले आयोगको प्रभावकारितामाथि प्रश्न उठाउनुभएको हो ।
राईले प्रधानमन्त्रीले आयोगका आयुक्तहरूलाई बोलाएर दबाबमा राखेको भन्ने चर्चाबारे सत्यतथ्य माग गर्नुभयो । कार्यकारी प्रमुखबाटै अधिकारको दुरुपयोग भएको अवस्थामा कारबाही गर्ने निकाय कुन हो भन्दै उहाँले दुविधा व्यक्त गर्नुभयो ।
सांसद राईले अख्तियारको परिभाषा केवल आर्थिक विषयमा मात्र सीमित हुन नहुने तर्क गर्नुभयो । उहाँले अधिकारको दुरुपयोग हुनु नै भ्रष्टाचार भएको उल्लेख गर्दै आयोगले आर्थिकबाहेकका अन्य प्रशासनिक र पदीय दुरुपयोगका विषयमा पनि सक्रियता देखाउनुपर्नेमा जोड दिनुभयो ।
आयोगको काम कारबाही हालसम्म कर्मकाण्डी मात्र देखिएको टिप्पणी गर्दै उहाँले निष्पक्ष र निर्भय भएर काम गर्न नसके आयोगको औचित्यमाथि प्रश्न उठ्ने बताउनु भयो ।
अध्यक्ष राईले भन्नुभयो, ‘प्रधानमन्त्रीले आयुक्तहरूलाई बोलाएर बन्दी जस्तो बनाउनुभएको कुरा सदनमा पनि उठेको थियो । त्यो दिन आयोगका पदाधिकारीहरूलाई त्यहाँ लगेर के के गर्न लगाइयो, यसबारे स्पष्ट पारिनुपर्छ ।’
राईले आयोगले गर्ने अनुसन्धानमा विभेद भएको आरोप समेत लगाउनु भयो । पूर्वप्रधानमन्त्री र पूर्वमन्त्रीहरूलाई मात्र कारबाहीको दायरामा ल्याइने तर बहालवाला पदाधिकारीहरूलाई उन्मुक्ति दिइने प्रवृत्तिप्रति उनले आपत्ति जनाउनु भयो । –न्युज एजेन्सी नेपाल
