काठमाडाैँ । सिरहाको गोलबजारमा बिहीबार दिउँसो प्रदर्शनका क्रममा गोली लागेर एक युवकको मृत्यु भएको छ। मृतक स्थानीय गणेश यादव हुन्। घटनामा गोली लागेर अर्का एक जना घाइते भएका छन्। उनको स्थानीय क्लिनिकमा उपचार भइरहेको छ।
यसअघि गोलबजारमा दुई समूहबीच झडप भएको थियो। झडपपछि भएको प्रदर्शनका क्रममा गोली लागेर युवकको मृत्यु भएको बताइएको छ। मृतकको शव प्रदर्शनकारीले सडकमा राखेर प्रदर्शन गरिरहेका छन्।
यता प्रहरीले भने गोली नचलाएको दाबी गरेको छ। प्रहरीले स्थिति नियन्त्रणमा लिन हवाई फायर र अश्रुग्यास मात्रै प्रयोग गरेको जनाएको छ।
घटनापछि जिल्लास्थित सुरक्षा निकायका प्रमुखहरू गोलबजार पुगेका छन्। स्थिति नियन्त्रणमा लिन सबै सुरक्षा निकाय परिचालन गरिएको छ।
