काठमाडौं । युवा, श्रम तथा रोजगार मन्त्रालयले कोशी प्रदेशमा सीप तथा रोजगार मेला आयोजना गर्ने भएको छ । मन्त्रालयले असोज १४ देखि २० गतेसम्म इटहरीमा सातदिने सीप तथा रोजगार मेला आयोजना गर्न लागेको हो ।
मन्त्रालयमा बुधवार आयोजित पत्रकार सम्मेलनमा सहसचिव एवं सीप तथा रोजगार मेलाका संयोजक हेमराज तामाङले सीप विकास तथा रोजगारी प्रवद्र्धनका लागि मेलालाई राष्ट्रिय अभियानका रूपमा सञ्चालन गर्न लागिएको जानकारी दिनुभयो ।
मन्त्रालयले सातवटै प्रदेशलाई समेटेर सात चरणमा सीप तथा रोजगार मेला आयोजना गर्ने तयारी गरेको छ । सोहीअनुसार पहिलो चरणमा कोशी प्रदेशको इटहरीमा मेला आयोजना गर्न लागिएको तामाङले बताउनुभयो ।
सरकारले वैदेशिक रोजगारीलाई बाध्यताबाट विकल्पमा रूपान्तरण गर्दै स्वदेशमै रोजगारीका अवसर सिर्जना गर्ने नीति लिएको उहाँले बताउनुभयो । यही नीतिअनुसार सीप सिक्न इच्छुक व्यक्तिलाई आवश्यक सीप विकासको अवसर उपलब्ध गराउने तथा सीप हासिल गरिसकेका जनशक्तिलाई रोजगारदाताको मागअनुसार रोजगारीसँग जोड्ने उद्देश्यले मेला आयोजना गर्न लागिएको उहाँको भनाइ छ ।
मेलामा रोजगारदाता र श्रमिकबीच सीपअनुसारको मिलान तथा जब प्लेसमेन्टको व्यवस्था गरिने मन्त्रालयले जनाएको छ । मेलाले उद्योगको आवश्यकता, श्रम बजारको माग र सीपयुक्त जनशक्तिबीचको सम्बन्धलाई थप सुदृढ गर्ने अपेक्षा गरिएको छ ।
मेलामा उद्योग, सेवा, कृषि, निर्माणलगायतका १० वटा विधामा ६५ वटा स्टल रहनेछन् । तीनै तहका सरकार, निजी क्षेत्र तथा विकास साझेदारको सहभागिता र सहकार्यमा मेला सञ्चालन गरिने मन्त्रालयले जनाएको छ ।
तामाङले सीप तथा रोजगार मेला सामान्य कार्यक्रम नभई राष्ट्रिय अभियानका रूपमा अघि बढाउन लागिएको बताउनुभयो । मन्त्रालयको बजेट तथा कार्यक्रममा समेत यसलाई महत्वपूर्ण राष्ट्रिय ‘फ्ल्यागसिप’ कार्यक्रमका रूपमा समावेश गरिएको उहाँले जानकारी दिनुभयो ।
उहाँका अनुसार सीप सिक्न चाहनेलाई आवश्यक तालिम तथा सीप विकासको अवसर प्रदान गर्ने र सीप हासिल गरिसकेकालाई रोजगारदाताको मागअनुसार रोजगारीसँग जोड्ने गरी मेलालाई क्रमशः देशभर सञ्चालन गरिनेछ ।
