काठमाडौं । नेपाल अटोमोबाइल्स एसोसिएसन (नाडा) र भन्सार विभागबीच हालै रसुवामा गएको बाढीबाट अटोमोबाइल क्षेत्रमा परेको क्षति तथा प्रभावित व्यवसायीलाई राहत र सहुलियत उपलब्ध गराउने विषयमा छलफल भएको छ ।
असोज ७ गते नाडाका अध्यक्ष सुरेन्द्रकुमार उप्रेतीको नेतृत्वमा गएको प्रतिनिधिमण्डलले भन्सार विभागका महानिर्देशक यमलाल भुसालसँग भेट गरी बाढीबाट भएको क्षतिका विषयमा छलफल गरेको हो ।
भेटमा अध्यक्ष उप्रेतीले भदौ १० गते रसुवा, टिमुरेलगायत क्षेत्रमा गएको बाढीका कारण दसैंको सिजनलाई लक्षित गरी चीनबाट आयात गरिएका सयौं सवारीसाधनमध्ये ठूलो संख्यामा रसुवा नाकाबाट बगाएको जानकारी गराउनुभयो । उहाँले बाढीबाट प्रभावित पैठारीकर्ताले सरकारबाट पाउनुपर्ने राहत तथा सहुलियतका विषयमा छिटो निर्णय गरी कार्यान्वयन गर्न आग्रह गर्नुभयो ।
नाडाका महासचिव मिलनबाबु मल्लले चीनतर्फको सीमा भन्सार नखुलेका कारण सीमा क्षेत्रमा पाँच सयभन्दा बढी सवारीसाधन रोकिएको जानकारी गराउँदै त्यसको सहजीकरणका लागि आग्रह गर्नुभयो । उहाँले हालसम्म ११ सिटे विद्युतीय माइक्रोबस छुटाउन नसकिएको भन्दै त्यसका लागि समेत आवश्यक पहल गरिदिन अनुरोध गर्नुभयो ।
जवाफमा भन्सार विभागका महानिर्देशक भुसालले बाढीबाट प्रभावित व्यवसायीलाई सरकारले उपलब्ध गराउने सुविधा तथा सहुलियतको मोडालिटीबारे अर्थ मन्त्रालय, पूर्वाधार विकास मन्त्रालय र गृह मन्त्रालयबीच गृहकार्य भइरहेको जानकारी दिनुभयो ।
भेटमा नाडाका उपाध्यक्ष अभिक ज्योति र विक्रम सिंघानिया तथा सचिव मेघराज पौडेलको समेत उपस्थिति रहेको थियो ।
