काठमाडौं । सूचना तथा सञ्चारमन्त्री डा. विक्रम तिमिल्सिनाले नेपाली पत्रकारिता क्षेत्रको साख र व्यावसायिकतामाथि प्रश्न उठ्न थालेको बताएका छन् ।
हेम–सुनिल जोखिमपूर्ण टेलिभिजन पत्रकारिता पुरस्कार वितरण समारोहलाई सम्बोधन गर्दै मन्त्री तिमिल्सिनाले पत्रकारिताको गरिमा र साख जोगाउने जिम्मेवारी प्रत्येक पत्रकारको भएको बताए । पत्रकारिता आफैंमा एउटा संस्था भएकाले यसको साख र स्तर उन्नत बनाउने जिम्मेवारी पत्रकारहरूकै भएको उनको भनाइ थियो ।
नेपाल पत्रकार महासंघप्रति लक्षित गर्दै उनले कुनै अमुक संस्थाले पत्रकारिताको ठेक्का लिएर हिँडेको भ्रमबाट मुक्त हुनुपर्ने बताए । पत्रकारिता क्षेत्रको संरक्षण गर्ने जिम्मेवारी लिएको दाबी गर्ने संस्थाले नै क्षेत्रका समस्या समाधान गर्न नसकेको उनको आरोप थियो ।
मन्त्री तिमिल्सिनाले पत्रकारिता क्षेत्रको वर्तमान अवस्थाप्रति आफू गम्भीर रहेको उल्लेख गर्दै सञ्चार मन्त्रालय सम्हालेदेखि नै यस क्षेत्रका समस्या सुधारका लागि काम गरिरहेको दाबी गरे । पत्रकारिता र सञ्चार क्षेत्रका संस्थागत समस्या समाधान गर्न विद्यमान बेथिति र कमजोरीको मूल कारण पहिचान गर्न आवश्यक रहेको उनले बताए ।
सार्वजनिक सञ्चार संस्थाहरूको अवस्थाप्रति पनि उनले प्रश्न उठाए । अर्बौं रुपैयाँ बराबरको सम्पत्ति भएका संस्थाले समेत कर्मचारीलाई पेन्सन तथा अन्य सुविधा दिन कठिनाइ भोगिरहेको भन्दै उनले संस्थागत सुधारमा गम्भीर हुनुपर्ने बताए ।
उनले रेडियो नेपाल, नेपाल टेलिभिजन र गोरखापत्रजस्ता सार्वजनिक सञ्चार संस्थाको अवस्था कमजोर हुनुको कारण खोज्नुपर्ने बताए । लामो समयदेखि लेखापरीक्षण हुन नसकेको विषयमा समेत प्रश्न उठाउँदै उनले यस्ता संस्थालाई बलियो बनाउन सरकार र सम्बन्धित सबै पक्षले भित्रैबाट सुधारको प्रयास गर्नुपर्ने बताए ।
‘पत्रकारिता भनेको आफैंमा एउटा संस्था हो । यसको साख जोगाएर स्तर उन्नति गरिरहेका छौं कि हरेक दिनको पत्रकारिताले संस्थाको साख कमजोर गरिरहेका छौं भन्ने सोच्ने जिम्मेवारी हरेक पत्रकारको हो,’ उनले भने ।
उनले सार्वजनिक सञ्चार संस्थाको सुधार एक–दुई दिनमा सम्भव नहुने भन्दै त्यसका लागि एक–डेढदेखि दुई वर्षसम्म निरन्तर मेहनत गर्नुपर्ने बताए । संस्थाभित्र रहेका बेथिति र गलत अभ्यास नसुधारेसम्म सार्वजनिक सञ्चार संस्था र समग्र पत्रकारिता क्षेत्र सुधार हुन नसक्ने उनको भनाइ थियो ।
मन्त्री तिमिल्सिनाले विगतमा भएका गलत निर्णय र अभ्यास सच्याउन सबै पक्ष तयार हुनुपर्ने बताए । आफू सार्वजनिक सञ्चार संस्थासहित समग्र पत्रकारिता क्षेत्रलाई सुधारको दिशामा लैजान प्रयासरत रहेको उल्लेख गर्दै उनले पत्रकारिता क्षेत्रलाई गर्व गर्नलायक क्षेत्रका रूपमा विकास गर्ने प्रतिबद्धता जनाए।
