काठमाडौं । युवा, श्रम तथा रोजगारमन्त्री रामजी यादवले रोजगारदाता र रोजगारी खोज्ने व्यक्तिबीच रहेको असन्तुलन अन्त्य गर्ने गरी सरकारले काम अघि बढाएको बताउनुभएको छ ।
बुधवार मन्त्रालयमा आयोजित सीप तथा रोजगार मेलासम्बन्धी पत्रकार सम्मेलनमा मन्त्री यादवले रोजगारदाताले आवश्यक कामदार नपाउने र कामदारले रोजगारी नपाउने अवस्थाको अन्त्य गर्न ‘जब म्याचिङ’ प्रणालीलाई प्रभावकारी बनाउने तयारी भइरहेको बताउनुभयो ।
उहाँका अनुसार चालु आर्थिक वर्षमा ‘जब म्याचिङ’मार्फत एक लाख व्यक्तिलाई रोजगारीमा जोड्ने लक्ष्य सरकारले लिएको छ । रोजगारदाता र रोजगारी खोज्ने व्यक्तिलाई एउटै मञ्चमा ल्याएर आवश्यकताअनुसार रोजगारीमा जोड्ने उद्देश्यले सीप तथा रोजगार मेला आयोजना गर्न लागिएको उहाँले जानकारी दिनुभयो ।
मन्त्री यादवले विगतमा मन्त्रालयको प्राथमिकता वैदेशिक रोजगारीमा बढी केन्द्रित रहे पनि अब आन्तरिक रोजगारीलाई पनि प्राथमिकतामा राखेर काम अघि बढाइएको बताउनुभयो । युवालाई स्वदेशमै रोजगारी तथा स्वरोजगारीको अवसर सिर्जना गर्ने उद्देश्यले नीतिगत र कार्यक्रमगत सुधार अघि बढाइएको उहाँको भनाइ छ ।
उहाँले २०७१ सालमा राष्ट्रिय रोजगार नीति बने पनि त्यसलाई कार्यान्वयन गर्न आवश्यक ऐन, नियमावली, कार्यविधि र निर्देशिका बन्न नसक्दा आन्तरिक रोजगारीका क्षेत्रमा अपेक्षित काम हुन नसकेको बताउनुभयो ।
आन्तरिक रोजगारी प्रवद्र्धनका लागि राष्ट्रिय रोजगार नीति, २०८३ को मस्यौदामा सम्बन्धित सबै मन्त्रालयबाट सैद्धान्तिक सहमति लिइसकिएको र अब मन्त्रिपरिषद्मा पठाउने तयारी भइरहेको उहाँले जानकारी दिनुभयो । राष्ट्रिय रोजगार ऐनसम्बन्धी प्रस्ताव पनि सहमतिका लागि मन्त्रिपरिषद्मा पठाउने तयारी भइरहेको उहाँले बताउनुभयो ।
मन्त्री यादवले चालु वर्ष १२ वटा ‘फ्ल्यागसिप’ रोजगारी कार्यक्रम सञ्चालन गर्ने तयारी भइरहेको जानकारी दिनुभयो । उहाँका अनुसार स्वदेशमै रोजगारीको अवसर सिर्जना गर्ने उद्देश्यले विभिन्न कार्यक्रम तथा नीतिगत सुधार अघि बढाइएको छ ।
सरकारले पहिलोपटक सीप तथा रोजगार मेला आयोजना गर्न लागेको जानकारी दिँदै उहाँले यसलाई रोजगारदाता र श्रमिकबीच प्रत्यक्ष सम्पर्क स्थापित गर्ने माध्यमका रूपमा अघि बढाइने बताउनुभयो । तीनै तहका सरकार र निजी क्षेत्रको सहकार्यमा हरेक वर्ष यस्तो मेला आयोजना गर्ने तथा क्रमशः सातवटै प्रदेशमा विस्तार गर्ने योजना रहेको उहाँले जानकारी दिनुभयो ।
