काठमाडौं । नेपाली कम्युनिष्ट पार्टीका सांसद प्रेमबहादुर बयकले विदेशी भुक्तानी सेवा प्रदायकहरूको नेपाल प्रवेशले आर्थिक क्षेत्रमा नयाँ अवसर सिर्जना गर्ने बताउनुभएको छ ।
प्रतिनिधि सभाको बुधवारको बैठकमा ‘भुक्तानी तथा फछ्र्यौट (पहिलो संशोधन) विधेयक, २०८३’ माथिको सैद्धान्तिक छलफलमा भाग लिँदै उहाँले विदेशी सेवा प्रदायकलाई नेपाली बजारमा प्रवेश गराउने व्यवस्था सकारात्मक रहेको बताउनुभयो ।
सांसद बयकले विश्वव्यापी रूपमा विस्तार भइरहेको आर्थिक सञ्जाल र डिजिटल भुक्तानीको बढ्दो प्रभावलाई ध्यानमा राख्दै विधेयकले प्रविधि हस्तान्तरण र स्वस्थ प्रतिस्पर्धाको वातावरण निर्माण गर्न सक्ने बताउनुभयो ।
यद्यपि विदेशी कम्पनीहरूले नेपालमा आर्जन गरेको मुनाफा विदेश लैजाँदा मुलुकको विदेशी विनिमय सञ्चितिमा पर्न सक्ने प्रभावबारे सरकार थप सजग हुनुपर्ने उहाँको भनाइ थियो । उहाँले पुँजी पलायन रोक्न प्रभावकारी व्यवस्था गर्नुपर्नेमा जोड दिनुभयो ।
सांसद बयकले डिजिटल भुक्तानीको विस्तारसँगै साइबर सुरक्षा र डेटा गोपनीयताको विषयलाई प्राथमिकतामा राख्नुपर्ने बताउनुभयो । बढ्दो डिजिटल वित्तीय अपराध नियन्त्रणका लागि कडा कानुनी व्यवस्था आवश्यक रहेको उहाँले उल्लेख गर्नुभयो ।
उहाँले विदेशी ठूला कम्पनीसँग प्रतिस्पर्धा गर्न स्वदेशी भुक्तानी सेवा प्रदायकलाई सक्षम बनाउन सरकारले संरक्षणमुखी नीति अवलम्बन गर्नुपर्ने बताउनुभयो ।
ई–कमर्स र पर्यटन प्रवद्र्धनका लागि विधेयक महत्वपूर्ण हुन सक्ने भए पनि आन्तरिक अर्थतन्त्रको सुरक्षा र स्वदेशी पुँजीको संरक्षणलाई बेवास्ता गर्न नहुने सांसद बयकको भनाइ थियो ।
