काठमाडौं । नेकपा (एमाले) का केन्द्रीय सदस्य प्रदीप ज्ञवालीले पार्टी, कम्युनिष्ट आन्दोलन, लोकतन्त्र र राष्ट्र असाधारण संकटमा रहेको भन्दै त्यसको समाधानका लागि राष्ट्रिय एकता र पार्टी एकता आवश्यक रहेको बताएका छन्।
तीन दिनदेखि जारी एमाले केन्द्रीय कमिटी बैठकमा धारणा राख्दै ज्ञवालीले संकटको सामना गर्न पार्टी, कम्युनिष्ट आन्दोलन, लोकतन्त्र र राष्ट्रको एकता अपरिहार्य रहेको र त्यसको अगुवाइ एमालेले गर्नुपर्ने बताएका हुन्।
उनले राष्ट्रिय स्वतन्त्र पार्टी (रास्वपा) पपुलिज्म र अराजकताको जगमा उभिएको शक्ति भएकाले दीर्घकालीन रूपमा असफल हुने दाबी गर्दै त्यसले मात्रै एमाले स्वतः सफल नहुने बताए। एमालेले आफूलाई सुदृढ र रूपान्तरित गर्नुपर्ने उनको भनाइ थियो।
ज्ञवालीले एमालेलाई सत्ता र प्रमुख प्रतिपक्ष दुवै भूमिकाबाट बाहिर राख्ने प्रयास भइरहेको उल्लेख गर्दै त्यसलाई चिर्न पार्टीभित्र बलियो एकता र संगठनात्मक सुदृढीकरण आवश्यक रहेको बताए।
उनले पार्टी पुनर्जागरणको आधार आफ्नै पार्टीको एकता भएको उल्लेख गर्दै पार्टीभित्र वैचारिक समस्या नरहे पनि केही विषयमा दृष्टिकोणको भिन्नता रहेको बताए। निर्वाचनपछिको परिस्थितिलाई लिएर विकसित बहसले पार्टीभित्र ध्रुवीकरण बढाउँदै भावनात्मक विभाजन सिर्जना गरेको उनको भनाइ थियो।
निर्वाचन परिणामलाई सामूहिक चुनौतीका रूपमा लिएर जनतामा आशा र भरोसा विस्तार गर्नुपर्ने समयमा पार्टीभित्र अस्वस्थ अवस्था देखिएको ज्ञवालीले बताए। पुनर्गठनको बहस व्यक्ति केन्द्रित बनेको, अध्यक्षलाई सम्पूर्ण समस्याको कारकका रूपमा चित्रित गर्ने प्रयास भएको तथा पार्टीका नियमित कामसमेत प्रभावित भएको उनको भनाइ थियो।
ज्ञवालीले कार्यदलको प्रतिवेदनलाई एकताको आधार बनाएर अघि बढ्नुपर्ने सुझाव दिँदै त्यसको नेतृत्व पार्टी अध्यक्ष केपी शर्मा ओलीले गर्नुपर्ने बताए। ओली अब आन्तरिक संघर्षमा नभई योजनाबद्ध नेतृत्व विकास र पार्टीभित्र भावनात्मक एकता निर्माणमा केन्द्रित हुनुपर्ने उनको धारणा थियो।
पार्टीलाई लागेको धक्काको प्रमुख कारण आन्तरिक एकता कमजोर हुनु र जनतासँगको सम्बन्ध पातलिनु रहेको पनि उनले बताए। स्थानीय तहमा देखिने प्रतिस्पर्धा, अपेक्षा र त्यसबाट उत्पन्न द्वन्द्वलाई सही ढंगले व्यवस्थापन गर्न नसक्दा समस्या बढेको उल्लेख गर्दै प्रतिस्पर्धापछि पुनः बलियो एकता कायम गर्ने नयाँ विधि खोज्नुपर्ने उनले बताए।
ज्ञवालीले कार्यदलको प्रतिवेदनमा उल्लेख गरिएका कार्यभारसँगै जनजीविकाका मुद्दालाई पनि प्राथमिकतामा राख्नुपर्ने बताए। जनतासँगको सम्बन्ध मजबुत बनाउन जनजीविकासँग सम्बन्धित विषयमा पार्टीले ध्यान केन्द्रित गर्नुपर्ने उनको भनाइ थियो।
बैठकमा चर्चामा आएको ‘प्रदीप ज्ञवालीको प्रतिवेदन’ सम्बन्धी विषयमा उनले आफ्नो कुनै छुट्टै प्रतिवेदन नरहेको स्पष्ट पारे। पार्टीभित्र समस्या उत्पन्न हुँदा समन्वयकारी भूमिका निर्वाह गर्नु गल्ती नभएको उल्लेख गर्दै ध्रुवीकरण चर्किएको अवस्थामा कुनै एक पक्षमा उभिएर अतिवादी धारणा राख्दा सञ्चारमाध्यममा चर्चा पाए पनि त्यसले समस्या समाधान नगर्ने बताए।
पार्टीभित्रका विषयलाई सञ्चारमाध्यममार्फत परीक्षण गर्ने र असहमतिलाई सामाजिक सञ्जालमा सार्वजनिक गर्ने प्रवृत्ति बढ्दै गएको भन्दै ज्ञवालीले त्यसले क्षणिक चर्चा दिलाए पनि दिगो नेतृत्व निर्माण गर्न नसक्ने टिप्पणी गरे।
