काठमाडौँ : रसुवा–नुवाकोटमा भोटेकोशी बाढीबाट ज्यान गुमाएका तथा बेपत्ता भएका व्यक्तिको पहिचानका लागि नेपाल विज्ञान तथा प्रविधि प्रज्ञा प्रतिष्ठान (नास्ट), खुमलटारमा डीएनए प्रोफाइलिङको काम तीव्र पारिएको छ।
चीन सरकारले उपलब्ध गराएको अत्याधुनिक प्रविधि तथा चिनियाँ विशेषज्ञहरूको सहयोगमा नास्टको प्रयोगशालामा शव तथा हड्डीका नमूनाको डीएनए परीक्षण भइरहेको हो।
नास्टमा हालसम्म ८०५ वटा हड्डीका नमूना प्राप्त भएकोमा ७९८ वटा नमूना परीक्षणको प्रक्रियामा रहेको जनाइएको छ। तीमध्ये ५२२ वटा नमूनाको परीक्षण सम्पन्न भइसकेको र ४१९ वटा नमूनाको परीक्षणसम्बन्धी डाटा अन्तिम चरणमा रहेको जानकारी नास्टले दिएको छ।
नास्टका वरिष्ठ वैज्ञानिक डा. रामचन्द्र पौडेलका अनुसार चिनियाँ विशेषज्ञसँगको सहकार्यमा परीक्षणसँगै नेपाली वैज्ञानिक तथा प्राविधिकको तालिम र क्षमता विकासको काम पनि भइरहेको छ। परीक्षणबाट प्राप्त डाटा विश्लेषण तथा निकाल्ने कामसमेत सँगसँगै अघि बढाइएको उहाँले बताउनुभयो।
विज्ञान, प्रविधि तथा नवप्रवर्तन मन्त्री महावीर पुनले बुधबार बिहान नास्टमा भइरहेको शवको डीएनए परीक्षणको स्थलगत अवलोकन गर्नुभएको छ।
अवलोकनका क्रममा मन्त्री पुनले विधि विज्ञान प्रयोगशाला तथा प्रहरीको प्रयोगशालाको तुलनामा नास्टमा उपलब्ध क्षमता उपयोग गर्दै डीएनए परीक्षण अघि बढाइएको बताउनुभयो।
बाढीमा आफन्त तथा नातेदार गुमाएका परिवारलाई आफ्ना प्रियजनको पहिचान गर्न डीएनए परीक्षण महत्वपूर्ण रहेको उहाँले बताउनुभयो। परीक्षणमा सहयोग गरिरहेका चिनियाँ विशेषज्ञहरूको मेहनतप्रति मन्त्री पुनले आभार व्यक्त गर्नुभयो।
नेपालका लागि चिनियाँ राजदूत चाङ माओमिङले नास्टमा परिचालित चिनियाँ विशेषज्ञ, उपलब्ध गराइएका उपकरण तथा हालसम्मको प्रगतिको जानकारी दिनुभयो।
उहाँले बाढीबाट उत्पन्न कठिनाइको सामना गर्न नेपालको विज्ञान, प्रविधि तथा नवप्रवर्तन मन्त्रालय र नास्टसँग डीएनए परीक्षणलगायतका क्षेत्रमा थप समन्वय तथा सहकार्य गर्न चीन सरकार तयार रहेको बताउनुभयो।
