काठमाडाैँ । सामाजिक सञ्जाल फेसबुकको डेस्कटप संस्करणमा आइतबार दिउँसोदेखि प्राविधिक समस्या देखिएको छ। समस्या देखिएसँगै धेरै प्रयोगकर्ताको अकाउन्ट स्वतः लगआउट हुने, पेज लोड नहुने तथा “Account Temporarily Unavailable” भन्ने सन्देश देखिन थालेको छ।
प्रयोगकर्ताहरूले सामाजिक सञ्जाल तथा विभिन्न अनलाइन प्लेटफर्ममार्फत समस्या भएको जानकारी साझा गरिरहेका छन्। वेबसाइटहरूको सेवा अवस्थाबारे जानकारी दिने DownDetector मा समेत फेसबुकको सेवा अवरुद्ध भएको भन्दै ठूलो संख्यामा रिपोर्ट दर्ता भएका छन्। उक्त प्लेटफर्मका अनुसार समस्या आइतबार दिउँसो करिब १ः३० बजेदेखि देखिन थालेको हो।
हालसम्म मेटाले समस्याको कारण वा समाधानबारे कुनै आधिकारिक जानकारी सार्वजनिक गरेको छैन। प्राविधिक गडबडी विश्वव्यापी हो वा सीमित क्षेत्रमा मात्र परेको हो भन्ने विषय पनि स्पष्ट भइसकेको छैन।
