काठमाडौं। नेपाल वातावरण पत्रकार समूह (नेफेज) को ४१औँ वार्षिक साधारणसभाले निमेष रेग्मीको अध्यक्षतामा नयाँ कार्यसमिति निर्वाचित गरेको छ ।
निर्वाचित भएका पदाधिकारीहरूमा उपाध्यक्ष सुबोध गौतम, महासचिव सृष्टि काफ्ले तथा कोषाध्यक्ष भिष्मराज ओझा निर्विरोध निर्वाचित भएका हुन्।
यस्तै, पूर्ण सदस्यमा प्रकाश रिमाल र टीका बन्धन, विज्ञ सदस्यमा विजयराज पौडेल पनि निर्विरोध निर्वाचित भएको प्रमुख निर्वाचन आयुक्त राजेश घिमिरेले जनाएका छन् ।
साधारणसभाले पूर्णहरि अमात्यको संयोजकत्वमा तीन सदस्यीय लेखा समिति पनि गठन गरेको छ । उक्त समितमा राम प्रसाद हुमागाईं र अमिका राजथला सदस्यका रूपमा रहेका छन् ।
साधारणसभाका अवसरमा पत्रकार विद्या राई वातावरण पत्रकारिता पुरस्कारबाट पुरस्कृत भएकी छन् । राई समूहद्वारा स्थापित ‘वातावरण पत्रकारिता पुरस्कार’ पाउने ३९ औँ पत्रकार हुन् । उनी नेपाल न्यूज डटकमकी विशेष संवाददाता हुन् ।
नेपाल वातावरण पत्रकार समूह (नेवापस) ले आफ्नो ४१औँ वार्षिक साधारणसभामा उनलाई ‘वातावरण पत्रकारिता पुरस्कार–२०२५’ प्रदान गरेको हो ।
प्राकृतिक स्रोत तथा वित्त आयोगका निर्वतमान कार्यवाहक अध्यक्ष एवं समूहका विज्ञ सदस्य जुद्धबहादुर गुरूङ र समूहका अध्यक्ष चन्द्रशेखर कार्कीले राईलाई नगद र सम्मानपत्र प्रदान गरे ।
समूहले वातावरण र दिगो विकासका विविध विषयहरूमा पत्रकारहरूलाई प्रोत्साहन गर्न विगत ४ दशकयता हरेक वर्ष वातावरण पत्रकारिता पुरस्कार प्रदान गर्दै आएको छ ।
गत वर्ष (सन् २०२५ मा) वातावरण र दिगो विकासका विषयमा पत्रपत्रिका, रेडियो, टेलिभिजन तथा अनलाइनहरूमा प्रकाशित–प्रसारित सामग्री र कार्यक्रमहरूबाट प्राप्त आवेदन मध्येबाट राई सर्वोत्कृष्ट चयन भएकी हुन् ।
पुरस्कारका लागि समूहले पत्रकारहरूलाई सन् २०२५ भरिका आफ्ना लेख–रचना तथा कार्यक्रम समावेश गरी आवेदन दिन सार्वजनिक आह्वान गरेको थियो ।
समूहका पूर्व अध्यक्ष कसमस विश्वकर्माको संयोजकत्वमा पूर्व महासचिव संगीता लामा र विज्ञ सदस्य बटुकृष्ण उप्रेती सम्मिलित ३ सदस्यीय निर्णायक मण्डलको सिफारिसका आधारमा राईलाई पुरस्कार दिने निर्णय गरिएको हो ।
यससँगै समूहले २०२५ का लागि उत्कृष्ट र प्रशंसनीय रिपोर्टिङ गरेका अन्य ५ जना पत्रकारहरूलाई ‘उत्कृष्ट रिपोर्टिङ–२०२५’ प्रशंसा पत्र प्रदान गर्न सिफारिस गरेको छ । रासस
