काठमाडौँ। राष्ट्रिय स्वतन्त्र पार्टी (रास्वपा)का सांसद यज्ञमणि न्यौपानेले रास्वपा पनि संविधानको ‘स्टेकहोल्डर’ भएको दाबी गर्नुभएको छ ।
संविधान दिवसको अवसरमा काठमाडौमा आयोजित कार्यक्रममा उहाँले यस्तो दाबी गर्नुभएको हो । संविधान निर्माणका क्रममा आफूहरूले सार्वजनिक रूपमा संविधान निर्माण प्रक्रिया नरोक्न दबाब दिएको उहाँले बताउनु भयो ।
उहाँले रास्वपाको उदय नै संविधान कार्यान्वयन र संविधानका मूल्य–मान्यतालाई नागरिक तहसम्म पु¥याउने उद्देश्यले भएको दाबी गर्नुभयो । पुराना राजनीतिक दलहरूले संविधानको मर्मअनुसार प्रणाली कार्यान्वयन नगरेको उहाँको आरोप छ ।
उहाँले आफ्नै दल सरकारमा भएपनि संविधान विपरित गएमा खबरदारी गर्ने बताउनुभयो । संविधानले प्रश्न गर्ने अधिकार सुनिश्चित गरेको उल्लेख गर्दै त्यसलाई कुण्ठित गरिए निरंकुशता जन्मिने बताउनु भयो । उहाँले राष्ट्रिय स्वतन्त्र पार्टीका सांसदहरूले नजानेर वा नबुझेर सरकारसँग प्रश्न नगरेको दाबी गर्दै प्रश्नबाट आफूहरू कहिल्यै नभाग्ने बताउनु भयो । संसदलाई लोकतन्त्र, विधिको शासन र मानव अधिकारको संरक्षण गर्ने संस्थाका रूपमा प्रभावकारी बनाउन आफूहरूले रचनात्मक भुमिका निर्वाह गरिरहेको उहाँको भनाइ छ ।
उहाँले भन्नुभयो, ‘प्रश्न गर्ने अधिकार संविधानले दिएको हो । प्रश्न गर्ने अधिकार लोकतन्त्र हो। प्रश्न गर्ने अधिकारलाई कसैले कुण्ठित गर्यो भने निरङ्कुशता जन्मन्छ । आफ्नै सरकार छ, आफ्नै प्रश्न किन ? तर हामीले नजानेर प्रश्न गरेको होइन । नबुझेर प्रश्न गरेको होइन । प्रश्नबाट कहिल्यै भाग्दैनौँ र प्रश्न गर्न छोड्दैनौँ । हामीलाई प्रतिपक्ष नभन्नुहोला, रचनात्मक सत्तापक्ष हो । संविधानको पक्षधर हामी भनेर कहीँ कहीँ हुङ्कार पिटेको म सुन्छु । तर स्मरण रहोस् राष्ट्रिय स्वतन्त्र पार्टी यो संविधानको स्टेकहोल्डर हो । कसरी र किन भन्ने प्रश्न उठ्ला । हिजो संविधान निर्माण गर्दै गर्दाखेरि पुराना राजनीतिक दलका तिगडमबाज गर्ने नेताहरूले संविधान बन्न नदिएर धमिलो पानीमा माछा मार्दै थिए । हामी नै हो त्यतिखेर टुँडिखेलमा करायौँ होला, खुल्ला मञ्चमा बोल्यौँ होला, सडकमा उठ्यौँ होला । खबरदार संविधान निर्माण क्रम नरोक, रोक्दै नरोक । यदि तिमीले संविधान निर्माण रोक्यौ भने तिमीलाई सदनबाट बाहिर निस्किने अधिकार छैन भनेर बोल्ने हामी नै हौँ, आज ती हामीहरू राष्ट्रिय स्वतन्त्र पार्टीमा छौँ । त्यसैले यो नसम्झिनू राष्ट्रिय स्वतन्त्र पार्टीमा रहेकाले संविधानका पक्षधर होइनन् कि, संविधान संरक्षण गर्दैनन् कि, संविधानको मूल मर्म बुझ्दैनन् कि, संविधानमाथि प्रहार गर्छन् कि, यो कल्पना पनि नगर्नुहोस् । यो हामीले प्राप्त गरेको दस्तावेज हो, तपाईँहरू मार्फत खोसेर लिएको हो । यही संविधान कार्यान्वयनका लागि नयाँ दल जन्मिएको हो । यही संविधानको मूल्य मान्यतालाई नागरिक स्तरसम्म पु¥याउनका लागि हो । तपाईँहरूले यो संविधानको मर्ममाथि प्रहार गरेर अपाङ्गतामा परिणत गर्दै हुनुहुन्थ्यो । कति संविधान मिच्दै हुनुहुन्थ्यो ! समावेशी र समानुपातिकको सिद्धान्त ल्यायौँ, आरजु देउवा र मञ्जु खाँड जस्ता व्यक्तिहरूलाई तपाईँहरूले समानुपातिकमा राख्दै हिँड्नुभो । संविधान ल्याउने बेलामा कुर्सीमा थिएनौँ होला, त्यो संविधान जारी गर्दा नाम भेट्नुभएन । तर सत्यमा त्यो संविधान जारी गर्ने तपाई हामी नै हो । यो स्मरण रहोस् ।’
उहाँले संविधानको संरक्षण गर्न रास्वपा प्रतिवद्ध रहेको बताउनु भयो । –न्युज एजेन्सी नेपाल
