नुवाकोट: बाढीबाट प्रभावित परिवारलाई आफ्ना आफन्त तथा परिवारसँग सम्पर्कमा रहन र आवश्यक सूचना आदानप्रदान गर्न सहज होस् भन्ने उद्देश्यले सुविसुले नुवाकोटका विभिन्न राहत शिविर तथा प्रभावित समुदायमा निःशुल्क वाइफाइ इन्टरनेट सेवा उपलब्ध गराएको छ।
विदुर नगरपालिका–८, हात्तीगौडास्थित भैरुम माध्यमिक विद्यालयमा सञ्चालित विपद् राहत शिविरमा आश्रय लिइरहेका २०० भन्दा बढी बाढी प्रभावित नागरिकका लागि सुविसुले निःशुल्क वाइफाइ सेवा उपलब्ध गराएको हो। विद्यालयका प्रधानाध्यापक शिवराम श्रेष्ठ तथा समाजसेवी रमेश श्रेष्ठसँगको समन्वयमा उक्त सेवा सञ्चालनमा ल्याइएको सुविसुले जनाएको छ।
राहत शिविरमा रहेका प्रभावित नागरिकलाई परिवार तथा आफन्तसँग सम्पर्कमा रहन निःशुल्क इन्टरनेट सेवाले सहजता प्रदान गरेको विद्यालयका प्रधानाध्यापक शिवराम श्रेष्ठले बताउनुभयो।
उहाँले भन्नुभयो, “राहत शिविरमा रहेका २०० भन्दा बढी नागरिकका लागि सुविसुले उपलब्ध गराएको निःशुल्क वाइफाइ सेवाले परिवार तथा आफन्तसँग सम्पर्कमा रहन सहज बनाएको छ। विपद्को समयमा प्रभावित परिवारको सञ्चार आवश्यकतालाई ध्यानमा राखेर गरिएको यो सहयोग निकै महत्वपूर्ण छ।”
समाजसेवी रमेश श्रेष्ठले विपद्को समयमा सञ्चार अत्यन्त महत्वपूर्ण हुने भएकाले निःशुल्क इन्टरनेट सेवाले प्रभावित परिवारलाई ठूलो सहयोग पुगेको बताउनुभयो।
यसैगरी, विदुर नगरपालिका–५, पिपलटारस्थित चन्द्रज्योति माध्यमिक विद्यालयमा आश्रय लिइरहेका बाढी प्रभावित परिवार तथा नागरिकका लागि पनि सुविसुले निःशुल्क वाइफाइ इन्टरनेट सेवा उपलब्ध गराएको छ।
चन्द्रज्योति माध्यमिक विद्यालयका प्रधानाध्यापक बासुदेव पंगेनीका अनुसार विद्यालयमा आश्रय लिइरहेका तथा प्रभावित करिब ३०० देखि ४०० जनाले उक्त सेवाबाट लाभ लिइरहेका छन्।
उहाँले भन्नुभयो, “विपद्को यस कठिन परिस्थितिमा प्रभावित परिवारका लागि सुविसुले उपलब्ध गराएको निःशुल्क वाइफाइ सेवाले आफ्ना परिवार तथा आफन्तसँग सम्पर्कमा रहन सहज बनाएको छ। यस सहयोगका लागि सुविसुप्रति हार्दिक आभार व्यक्त गर्दछु।”
विपद्का समयमा सञ्चार केवल सुविधा नभई अत्यावश्यक माध्यम बन्ने भएकाले राहत शिविरमा उपलब्ध गराइएको निःशुल्क इन्टरनेट सेवाले प्रभावित समुदायलाई परिवार, आफन्त तथा सम्बन्धित निकायसँग सम्पर्कमा रहन सहयोग पुग्ने विश्वास गरिएको छ।
प्रभावित समुदायको आवश्यकता र अवस्थालाई ध्यानमा राख्दै सुविसुले नुवाकोटका विभिन्न राहत शिविर तथा बाढी प्रभावित क्षेत्रमा निःशुल्क इन्टरनेट सेवा विस्तार गर्दै आएको जनाएको छ।
