काठमाडौं । पूर्वप्रधानमन्त्री झलनाथ खनालले नेकपा परित्याग गर्दै नयाँ राजनीतिक अभियानका रूपमा ‘समाजवादी जागरण अभियान’ घोषणा गरेका छन्।
सोमबार काठमाडौंमा आयोजित पत्रकार सम्मेलनमार्फत खनालले अभियान घोषणा गरेका हुन्। अभियानको पहिलो भेलाले विभिन्न १५ वटा प्रस्ताव पारित गरेको जानकारी पनि उनले दिए। ती प्रस्तावमा विपद् जोखिमलाई ध्यानमा राख्दै राष्ट्रिय नीतिको पुनरवलोकन गर्नेदेखि कम्युनिस्ट आन्दोलनको वैचारिक तथा राजनीतिक पुनर्गठनसम्मका विषय समेटिएका छन्।
खनालको नेतृत्वमा शनिबार भएको भेलाले पारित गरेका प्रस्ताव सोमबार पत्रकार सम्मेलनमार्फत सार्वजनिक गरिएको हो। खनालले विद्यमान कम्युनिस्ट आन्दोलनलाई नयाँ वैचारिक र राजनीतिक आधारमा पुनर्गठन गर्न अभियान अघि बढाइएको बताए।
अभियानले सबै कम्युनिस्ट समूहलाई क्रान्तिकारी कार्यदिशाका आधारमा एकताबद्ध हुन आह्वान गरेको छ। पारित प्रस्तावमा कम्युनिस्ट आन्दोलनलाई पुनर्गठन र पुनर्संरचना गर्दै वैचारिक तथा राजनीतिक एकताको आधार तयार गर्न सबै कम्युनिस्ट समूहसँग आग्रह गरिएको छ।
खनालले अन्ततः एकीकृत क्रान्तिकारी कम्युनिस्ट पार्टी निर्माण गर्ने लक्ष्य अभियानले लिएको बताए। त्यसका लागि विगतको कम्युनिस्ट आन्दोलनका अनुभव, उपलब्धि, कमजोरी र चुनौतीको गम्भीर समीक्षा गर्दै नयाँ वैचारिक तथा राजनीतिक कार्यदिशाका आधारमा संगठन पुनर्गठन र एकीकरणको प्रक्रिया अघि बढाउनुपर्ने प्रस्तावमा उल्लेख छ।
अभियानले कम्युनिस्ट आन्दोलनमा रहेका क्रान्तिकारी शक्तिहरूबीच एकता कायम गरी एकीकृत नेकपा निर्माणको दिशामा योगदान गर्न सबै कम्युनिस्ट क्रान्तिकारीलाई आह्वानसमेत गरेको छ।
