काठमाडौं । कर्णाली प्रदेशका कीर्तिमानी धावक हरिबहादुर रोकायालाई ‘एक्स्ट्रिम कर्णाली याक्स हिरोज’का रूपमा सम्मान गरिएको छ ।
कर्णाली याक्स स्पोर्ट्स प्रालिले आयोजना गरेको विशेष समारोहमा रोकायालाई २ लाख ५० हजार रुपैयाँ नगदसहित सम्मान गरिएको हो । कर्णाली प्रदेशका मुख्यमन्त्री मङ्गलबहादुर शाही र कर्णाली याक्सका अध्यक्ष गिहेन्द्र घिमिरेले संयुक्त रूपमा रोकायालाई सम्मानपत्र प्रदान गर्नुभयो ।
सम्मानसँगै रोकाया कर्णाली याक्स टोलीको ब्रान्ड एम्बेसडरका रूपमा समेत जोडिनुभएको छ ।
सियोल र बार्सिलोना ओलम्पिकमा नेपालको प्रतिनिधित्व गरिसक्नुभएका रोकायाले ११ वटा राष्ट्रिय स्वर्ण पदक जित्नुभएको छ । एभरेस्ट म्याराथनमा विश्व कीर्तिमान कायम गर्नुभएका रोकाया पछिल्लो समय जुम्लामा रहेर नयाँ खेलाडी उत्पादनमा सक्रिय हुनुहुन्छ । ‘हरि गुरु’का नामले परिचित रोकायाले आफ्नै निजी जग्गा र मिलबाट हुने आम्दानीसमेत खेलाडीको प्रशिक्षणमा खर्च गर्दै आउनुभएको छ ।
सम्मानस्वरूप प्राप्त २ लाख ५० हजार रुपैयाँ पनि जुम्लाका खेलाडीको प्रशिक्षणमै खर्च गर्ने रोकायाले बताउनुभयो ।
कार्यक्रममा रोकायाले जुम्लामा ‘हाइ अल्टिच्युड ट्रेनिङ सेन्टर’ निर्माणको आवश्यकता औँल्याउनुभयो । लामो समयदेखि पहल हुँदै आए पनि केन्द्र निर्माणले मूर्त रूप लिन नसकेको भन्दै उहाँले नेपाली धावकको क्षमता विकासका लागि यस्तो प्रशिक्षण केन्द्र आवश्यक रहेको बताउनुभयो ।
मुख्यमन्त्री शाहीले रोकायाको खेलप्रतिको समर्पण प्रशंसनीय रहेको बताउँदै उहाँले आफ्नै प्रयासमा सञ्चालन गर्दै आएको प्रशिक्षण केन्द्रलाई प्रदेश सरकारले आवश्यक सहयोग गर्ने प्रतिबद्धता जनाउनुभयो ।
कर्णाली याक्सका अध्यक्ष घिमिरेले टोली क्रिकेटमा मात्र सीमित नरही कर्णालीको खेलकुद, खेल प्रतिभा र समुदायको विकासमा समेत सहकार्य गर्न प्रतिबद्ध रहेको बताउनुभयो ।
कार्यक्रममा सामाजिक विकासमन्त्री जितबहादुर मल्ल, राष्ट्रिय खेलकुद परिषद्का सदस्य सचिव टंकलाल घिसिङ तथा कर्णाली प्रदेश खेलकुद विकास परिषद्का पदाधिकारीहरूको उपस्थिति थियो ।
