काठमाडौं। १६ औं दक्षिण एसियाली शारीरिक सुगठन तथा फिजिक स्पोर्ट्स च्याम्पियनसिपमा सहभागी हुन ७ खेलाडीसहित ९ सदस्यीय नेपाली टोली मंगलबार भुटानको थिम्पु जाने भएको छ ।
असार १६ देखि २० गतेसम्म हुने प्रतियोगितामा ५ पुरुष र २ महिला खेलाडीले नेपालको चुनौती पेश गर्ने छन् ।
पुरुष ७५ केजीमा सगेन्द्र सिंह, ८० केजीमा दीपजंग रोका मगर, ८५ केजीमा सागर श्रेष्ठ, स्पोर्ट्स फिजिक १७० सेन्टीमिटरमुनि आकाश श्रेष्ठ र स्पोर्ट्स फिजिक १७० सेन्टीमिटरमाथि पुकार शाक्यले प्रतिस्पर्धा गर्ने छन् ।
महिला मोडल फिजिक १५५ सेन्टीमिटरमाथि विनु जिटी तथा स्विमसुटमा सीता खत्रीले सहभागिता जनाउने छन् । नवौं मिस्टर हिमालय र दोश्रो मिस्टर महानगर शारीरिक सुगठन प्रतियोगितालाई मध्यनजर गरी खेलाडी छनोट गरिएको महासंघले जनाएको छ ।
अफिसियलमा नेपाल शारीरिक सुगठन तथा फिट्नेस महासंघका सचिव दिनेशकुमार राजभण्डारी तथा निर्णायकमा जोनसन जोनछेन छन् ।
टोलीलाई सफलताको शुभकामना दिदै राष्ट्रिय खेलकुद परिषद्का उपाध्यक्ष विशाल श्रेष्ठले सोमबार एक कार्यक्रमबीच बिदाइ गरे ।
दक्षिण एसियाली शारीरिक सुगठनको पहिलो संस्करणदेखि निरन्तर सहभागी नेपालले हालसम्म १२ स्वर्ण, १६ रजत र १९ कांस्य जितेको महासंघले जनाएको छ । १५ मध्ये ३ संस्करण नेपालमै भएको थियो ।
