काठमाडौं । नेपाल र चीनमा रहेका नेपाली विद्यार्थी तथा युवाबीच सहकार्य, समन्वय र संगठनात्मक गतिविधिलाई व्यवस्थित बनाउने उद्देश्यले एनएसओ चाइनाको सम्पर्क कार्यालय काठमाडौंको बुढानीलकण्ठमा स्थापना गरिएको छ ।
सम्पर्क कार्यालयको उद्घाटन गर्दै एनएसओ चाइनाका संस्थापक अध्यक्ष मनोज भट्टले नेपालबाट चीनमा अध्ययन गर्न जाने विद्यार्थी तथा चीनमा अध्ययनरत नेपाली विद्यार्थीबीच समन्वय र सहकार्यका लागि प्रभावकारी संस्थाको आवश्यकता महसुस गरी एनएसओ चाइनाको स्थापना गरिएको बताए ।
उनका अनुसार संस्थाले चीनमा अध्ययन गर्न जाने नेपाली विद्यार्थीलाई आवश्यक सहयोग, समन्वय तथा विभिन्न गतिविधिमा सहजीकरण गर्नेछ ।
अध्यक्ष भट्टले नेपालबाट ठूलो खर्च गरेर टाढाका युरोप तथा अमेरिका जानुभन्दा नजिकै रहेको चीनका शैक्षिक अवसरलाई पनि नेपाली विद्यार्थीले गम्भीर रूपमा लिनुपर्ने बताए । “चीन अहिले विश्वका विभिन्न क्षेत्रमा अग्रणी राष्ट्रका रूपमा अघि बढिरहेको छ । त्यसैले नेपाली विद्यार्थी चीन जान हिच्किचाउनु हुँदैन,” उनले भने ।
चीनमा स्ट्रक्चरल इन्जिनियरिङ अध्ययन गरिरहेका भट्टले एनएसओ चाइनामार्फत नेपाली विद्यार्थीलाई अध्ययन तथा अन्य क्षेत्रमा सक्दो सहयोग र सहजीकरण गर्ने प्रतिबद्धता व्यक्त गरे ।
कार्यक्रममा विभिन्न विषयमा विद्यावारिधि गरेका व्यक्ति तथा चीनमा अध्ययन गरेका र अध्ययनरत नेपाली विद्यार्थीहरूको उल्लेखनीय उपस्थिति थियो । सहभागीहरूले नेपाल र चीनमा रहेका नेपाली विद्यार्थी तथा युवाबीच समन्वय र सहकार्य बढाउन एनएसओ चाइनाजस्तो संस्थाको आवश्यकता रहेको धारणा राख्दै संस्थाको आगामी यात्राका लागि शुभकामना दिएका थिए ।
एनएसओ चाइनाले आगामी दिनमा नेपाल तथा चीनमा रहेका नेपाली विद्यार्थी र युवाबीच सम्बन्ध विस्तार गर्दै शैक्षिक, व्यावसायिक तथा सामाजिक क्षेत्रमा सहकार्यका गतिविधिलाई थप प्रभावकारी बनाउने लक्ष्य लिएको जनाएको छ ।
