बैठकमा सांसद अच्युतम लामिछानेले किसानहरू खेतीपातीको मुख्य समयमा मल, बीउबिजन र कृषि औजारको अभाव झेल्न बाध्य भएको बताउँदै आवश्यक सामग्री सहज र समयमै उपलब्ध गराउन सरकारसँग माग गर्नुभयो । उहाँले समयमा मल नपाउँदा कृषि उत्पादनमा गिरावट आउने र किसान निराश बन्दै गएको उल्लेख गर्दै कृषि पेशा नै संकटमा पर्न थालेको बताउनुभयो ।
उहाँले खेतदेखि उपभोक्तासम्म कृषि उत्पादन पुर्याउन संघर्ष गरिरहेका किसानको समस्याप्रति सरकार संवेदनशील हुनुपर्ने धारणा राख्नुभयो ।
त्यस्तै सांसद इन्दिरा रानामगरले झापामा निर्माणाधीन एशियाली राजमार्ग परियोजनाअन्तर्गत बस्ती नजिकै अलकत्रा उत्पादन गरिँदा वायु प्रदूषण बढेको र स्थानीयवासी स्वास्थ्य समस्याबाट प्रभावित भएको बताउनुभयो । उहाँले पटक–पटक ध्यानाकर्षण गराउँदा पनि समस्या समाधान नभएको भन्दै तत्काल उक्त संरचना हटाउन सरकारसँग माग गर्नुभयो ।
उहाँले पाटन औद्योगिक क्षेत्रमा घरेलु उद्योगका लागि छुट्याइएको स्थानमा ठूला उद्योग सञ्चालन हुँदा स्थानीय बासिन्दा बिरामी परेको र केहीको मृत्यु समेत भएको जानकारी आएको उल्लेख गर्दै त्यसतर्फ पनि सरकारको ध्यान जानुपर्ने बताउनुभयो ।
सांसद अनुष्का श्रेष्ठले पर्यटन प्रवर्द्धनका लागि सक्षम नेतृत्व र प्रभावकारी संरचना आवश्यक रहेको बताउँदै सम्बन्धित निकायमा पदाधिकारी नियुक्ति प्रक्रिया ढिलाइ नगर्न सरकारलाई आग्रह गर्नुभयो ।
उहाँले प्रभावकारी पर्यटन प्रवर्द्धनका लागि समयमै योग्य र सृजनात्मक नेतृत्व आवश्यक रहेको उल्लेख गर्दै सार्वजनिक सेवा प्रवाहलाई पनि तीव्र र प्रभावकारी बनाउन सरकारलाई ध्यानाकर्षण गराउनुभयो ।
