काठमाडौँ। गृहमन्त्री ओमप्रकाश अर्यालसँग विश्व हिन्दू महासङ्घका अध्यक्ष अस्मिता भण्डारीलगायत संस्थाका प्रतिनिधिले भेट गर्नुभएको छ ।
सिंहदरबारस्थित मन्त्रालयमा आज भेट गर्दै उहाँहरुले धार्मिक क्षेत्रको शान्ति सुरक्षाको विषयको सम्बन्धमा ध्यानाकर्षण गराउनुभयो ।
मन्त्रालयमा भएको भेटमा गृहमन्त्री अर्यालले बहुसांस्कृतिक र बहुजातिय देशमा धार्मिक अशान्ति फैलिने किसिमका कुनै पनि गतिविधि गर्न नहुने र कसैले गरेमा त्यसलाई कानुन बमोजिम कारबाहीको दायरामा ल्याइने बताउनुभएको मन्त्री अर्यालको सचिवालयले जनाएको छ ।
भेटका क्रममा मन्त्री अर्यालले देशमा शान्ति तथा अमनचयन कायम गर्न र एक अर्काको धार्मिक आस्था तथा विश्वासलाई स्वीकार र सम्मान गर्दै समाजमा धार्मिक सहिष्णुता, सामाजिक सद्भाव र अमनचैन कायम राख्न धार्मिक सङ्घ संस्थाको महत्वपूर्ण भूमिका रहने बताउनुभयो ।
छलफलका क्रममा उहाँले सामाजिक सञ्जालमार्फत फैलाइने धार्मिक असहिष्णुता र भ्रामक खबर तथा सूचनाको नागरिकस्तरबाटै प्रतिवाद गर्न र भ्रामक खबर विरुद्ध सामाजिकस्तरमा नै सचेतना फैलाएर समाजमा सामाजिक तथा धार्मिक सहिष्णुता कायम राख्न अनुरोध गर्नुभएको छ । रासस
