काठमाडौं । नेपाल–चीन सीमा नाकामा वस्तु ढुवानी तथा सर्वसाधारणको आवतजावतमा देखिएका अवरोध हटाउन दुवै पक्षबीच गम्भीर संवाद सुरु भएको छ ।
स्थलगत निरीक्षणका क्रममा नेपाली पक्षले सीमा नाकामा देखिएका विभिन्न व्यवधानका कारण व्यापारिक गतिविधिमा परेको नकारात्मक प्रभावबारे चिनियाँ टोलीलाई जानकारी गराएको हो ।
परराष्ट्र मन्त्रालयका सहसचिव रामकाजी खड्काले चिनियाँ दूतावासका प्रतिनिधिसँगको संवादमा सीमा नाकामा देखिएका समस्या तत्काल सम्बोधन गर्नुपर्नेमा जोड दिनुभयो । उहाँले नाकाको वर्तमान अवस्थाबारे चिनियाँ राजदूत तथा सम्बन्धित निकायमा सकारात्मक प्रतिवेदन पेश गर्न आग्रह गर्दै यसबाट दुई देशबीचको व्यापारिक सम्बन्ध थप सुदृढ हुने विश्वास व्यक्त गर्नुभयो ।
यसअघि नाकामा रहेका ५७ वटा ढुवानीका साधनको व्यवस्थापनका विषयमा पनि छलफल भएको थियो । स्थानीय भन्सार कार्यालय र चिनियाँ पक्षबीच प्रभावकारी समन्वय गर्न सके नाका सञ्चालनलाई थप सहज बनाउन सकिने नेपाली अधिकारीहरूले बताएका छन् ।
नेपाली पक्षले सीमा नाका पूर्णरूपमा सञ्चालनमा ल्याउन विशेष जोड दिएको छ । छलफलमा दुवै पक्षले सीमा नाकामा देखिएका प्राविधिक तथा प्रशासनिक समस्यालाई आपसी समन्वयमार्फत समाधान गर्नेमा सहमति जनाएका छन् ।
