पश्चिम खण्डमा विद्युत् पोल स्थानान्तरण, मादी पुलको पहुँचमार्गका लागि जग्गा प्राप्ति तथा दमौली डिभिजन कार्यालयको भवन स्थानान्तरणमा देखिएको समस्या समाधान गरिएको पूर्वाधार विकास मन्त्रालयले जनाएको छ।
मन्त्रालयको सहजीकरणमा विद्युत् पोल स्थानान्तरणको काम सम्पन्न भएको छ भने मादी पुलको एप्रोच रोडका लागि आवश्यक जग्गासम्बन्धी विवाद पनि समाधान गरिएको छ। त्यसैगरी दमौली डिभिजन कार्यालयको नयाँ भवन निर्माणका लागि सहमति जुटाएर बोलपत्रमार्फत निर्माण प्रक्रिया अघि बढाइएको छ।
आयोजनाको पूर्वी खण्ड आबुखैरेनीदेखि जामुनेसम्मको निर्माण सम्पन्न भइसकेको छ। जामुनेदेखि पोखरासम्मको ३८.४१ किलोमिटर पश्चिम खण्डको निर्माण आगामी नोभेम्बरसम्म सम्पन्न गर्ने लक्ष्य राखिएको छ।
पश्चिम खण्डमा पुललगायतका मुख्य संरचना निर्माण भइसकेका छन् भने मुख्य चार लेन सडक निर्माणको काम पनि पूरा भएको छ। कुल ३८ किलोमिटर सर्भिस लेनमध्ये करिब ३२ किलोमिटर निर्माण सम्पन्न भइसकेको छ। फुटपाथ तथा बाँकी करिब ६ किलोमिटर सर्भिस लेन निर्माणको काम भने पूरा गर्न बाँकी छ। विद्युत् पोल स्थानान्तरणको समस्या समाधान भएपछि यी काम पनि आगामी नोभेम्बरसम्म सम्पन्न गर्ने तयारी छ।
मादी आर्क ब्रिजको ३१० मिटर लामो संरचना निर्माण सम्पन्न भइसकेको छ। अहिले पुलको फिनिसिङ तथा पहुँच सडक निर्माणको काम भइरहेको छ। त्यस्तै, १९० मिटर लामो सेती पुलको करिब ७० प्रतिशत निर्माण सम्पन्न भएको छ। सेती पुलको बाँकी काम आगामी अप्रिलसम्म सम्पन्न गर्ने तालिका रहेको छ।
सडक सुरक्षालाई प्रभावकारी बनाउन जोखिमयुक्त पहिरोको दिगो रोकथामका लागि थप अध्ययन गरी ठेक्का प्रक्रियामा लैजाने काम पनि अन्तिम चरणमा पुगेको मन्त्रालयले जनाएको छ।
यसैगरी, मुग्लिनदेखि आबुखैरेनीसम्मको करिब ८ किलोमिटर सडकखण्डमध्ये करिब ४ किलोमिटर सडक मर्स्याङ्दी नदीपारिबाट निर्माण गर्ने गरी ठेक्का प्रक्रिया अघि बढाइएको छ।
मुग्लिन–पोखरा सडक आयोजना सम्पन्न भएपछि पर्यटकीय सहर पोखरा तथा गण्डकी प्रदेशको मुख्य प्रवेशद्वारका रूपमा रहेको यस सडकखण्डमा यातायात सहज हुनुका साथै यात्रा समयसमेत घट्ने अपेक्षा गरिएको छ।
