काठमाडौं । हिमालमा जलवायु परिवर्तनको प्रभाव, जलवायु न्याय तथा भोटेकोशी–त्रिशूली विपद्सम्बन्धी संसदीय विशेष समितिको सभापति पदका लागि सांसद गणेश पराजुलीले एकल उम्मेदवारी दर्ता गराउनुभएको छ ।
समितिको सभापति चयनका लागि तोकिएको प्रक्रियाअनुसार पराजुलीले उम्मेदवारी दर्ता गराउनुभएको हो । सभापति पदमा उहाँको मात्रै उम्मेदवारी परेकाले निर्विरोध चयन हुने सम्भावना रहेको छ ।
समितिले हिमाली क्षेत्रमा जलवायु परिवर्तनका कारण देखिएका असर, जलवायु न्यायका विषय तथा भोटेकोशी–त्रिशूली क्षेत्रमा पछिल्लो समय देखिएको विपद्को अध्ययन, अनुगमन र आवश्यक नीतिगत सुझाव दिने कार्य गर्नेछ ।
भोटेकोशी–त्रिशूली क्षेत्रमा आएको विपद्बाट जनधन तथा भौतिक पूर्वाधारमा ठूलो क्षति पुगेपछि त्यसको कारण, प्रभाव र पुनःस्थापनाका विषयमा संसदीय तहबाट अध्ययन तथा आवश्यक पहल गर्न विशेष समिति गठन गरिएको हो ।
