काठमाडौँ । २०औँ एशियाली खेलकुदमा सहभागी नेपाली आर्चरी टोलीले व्यक्तिगत प्रदर्शनमा सुधार गरे पनि पदकविहीन हुँदै प्रतियोगितामा आफ्नो चुनौती समाप्त गरेको छ ।
टोलीका प्रशिक्षक तथा खेलाडीहरूले व्यक्तिगत प्रदर्शनमा सुधार आएको बताए पनि अन्तर्राष्ट्रियस्तरमा बढ्दो प्रतिस्पर्धा, आधुनिक प्रविधिको प्रयोग र पर्याप्त अभ्यासको अभावका कारण अपेक्षित नतिजा हासिल गर्न नसकेको बताएका छन् ।
नेपाली आर्चरी टोलीका प्रशिक्षक प्रेमप्रसाद पुनले टोलीले नेपालको औसत स्कोर कायम राखे पनि विश्वस्तरीय प्रतिस्पर्धासँग जुध्न अझै धेरै सुधार आवश्यक रहेको बताउनुभयो । उहाँका अनुसार टोलीले ओलम्पिक ‘वाइल्ड कार्ड’का लागि आवश्यक स्कोरसमेत प्राप्त गरेको छ ।
उहाँले अन्य राष्ट्रका खेलाडी युवा पुस्ता र आधुनिक प्रविधिको प्रयोगसँगै धेरै अघि बढिसकेको बताउँदै नेपालले आफ्नो स्तरमा सुधार गरे पनि विश्वस्तरको प्रदर्शनसँगको दूरी अझै फराकिलो रहेको उल्लेख गर्नुभयो ।
खेलाडी तिलक पुन मगरले व्यक्तिगत स्पर्धामा आफ्नो प्रदर्शन सुधार भए पनि अन्तिम नतिजा अपेक्षाअनुसार आउन नसकेको बताउनुभयो । आफ्नो लक्ष्य ओलम्पिक छनोटका लागि आवश्यक स्कोर पूरा गर्नु रहेको र त्यो हासिल भएको उहाँले जानकारी दिनुभयो । तर, अन्य प्रतिस्पर्धीको स्तर निकै माथि पुगिसकेको अनुभव भएको उहाँको भनाइ थियो ।
कतारका खेलाडीसँगको हारले आफूलाई निराश बनाएको उल्लेख गर्दै पुन मगरले विगतमा आफूले हासिल गरेको स्कोरले उत्कृष्ट ३० भित्र स्थान बनाउन सकिने भए पनि अहिले प्रतिस्पर्धाको स्तर बढेका कारण वरीयता खस्किएको बताउनुभयो ।
अर्की खेलाडी ज्ञानु अवालेले प्रतिकूल मौसम र अन्तर्राष्ट्रिय अनुभवको कमी नेपाली टोलीका मुख्य कमजोरी रहेको बताउनुभयो । प्रतियोगिताका क्रममा सुरुदेखि नै वर्षा भइरहे पनि नेपालमा वर्षाका बेला खेल्ने अभ्यास पर्याप्त नभएकाले प्रदर्शनमा असर परेको उहाँको भनाइ थियो ।
अवालेले अन्तर्राष्ट्रियस्तरमा प्रतिस्पर्धा गर्न खेलाडीलाई नियमित वैदेशिक सहभागिता, आधुनिक अभ्यास र विशेष प्रशिक्षणको तत्काल आवश्यकता रहेको बताउनुभयो ।
