काठमाडौँ । नेपाली काँग्रेसका महामन्त्री गगनकुमार थापाले पार्टीको विशेष महाधिवेशन गर्नु अनिवार्य रहेको बताउनुभएको छ ।
शुक्रवार पार्टी मुख्यालयमा विशेष महाधिवेशन पक्षधरहरुको माग पत्र बुझेपछि उहाँले पार्टी केन्द्रिय कार्य समितिले अव विशेष महाधिवेशनको माग पूरा गर्न अनिवार्य भएको प्रतिक्रिया दिनुभएको हो । महामन्त्री थापाले मंसिर महिनाभित्र पार्टीको १५ औ महाधिवेशन नभएपछि पुस मसान्तसम्म गर्ने भन्ने पार्टीको निर्णय बाध्यकारी व्यवस्था भएको र त्यो हुननसके पछि विशेष महाधिवेशनको मागअनुसार अघि बढ्नु पार्टीको लागि अनिवार्य शर्त भएको बताउनु भयो । महामन्त्री थापाले विशेष महाधिवेशनमा जाने कुरालाई अव पार्टी केन्द्रिय कार्य समितिले नै स्विकार गर्नुपर्ने भएकाले त्यसमा आफूले थप टिप्पणी गर्न आवश्यक नभएको जिकिर समेत गर्नुभयो ।
उहाँले भन्नुभयो,‘यो हाम्रो जिम्मेवारी हो । हामी यसलाई पार्टीको चालु केन्द्रिय कार्य सम्पादन समितिमा तपाईहरुबाट प्राप्त भएको पत्रको बारेमा जानकारी गराउनेनै छौ । पार्टीको विधानभन्दा माथि हामी कोही पनि छैनौ । र पार्टीको विधान नमान्ने अधिकार सुविधा हामी कसैलाई छैन । पार्टीको विधानले नै एउटा विशिष्ट व्यवस्था गरेको छ । विधानको धारा १७ (२) ले नेपाली काँग्रेस पार्टीको ४० प्रतिशत भन्दा बढि महाधिवेशन प्रतिनिधिले कुनै विशिष्ट कारण देखाएर विशेष महाधिवेशनको आवश्यक्ता बोध गरेमा विशेष महाधिवेशन डाकिनु पर्दछ । त्यो अनिवार्य छ । त्यो ऐच्छिक विषय होइन । म साथीहरुले पहिलो पटक दिएको पत्र पनि स्मरण गर्न चाहन्छु । विशेष महाधिवेशनले नै केही विषयहरुको छिनोफानो गर्नु पर्दछ । मंसीर महिना भित्र पार्टीले नियमित महाधिवेशन गर्छ भने विशेष महाधिवेशनको आवश्यक्ता पर्दैन ।
अन्यथा विशेष महाधिवेशन अनिवार्य छ भन्ने कन्टेन्टसहितको पत्र यहाँ दर्ता गराउनुभएको थियो । र म यो पनि सम्झन्छु कि हामीले यो बीचमा मंसिर १५ गते कार्यतालिका निर्माण ग¥यौं । र कार्यतालिका केन्द्रिय समितिले पारित गर्दैगर्दा पुस मसान्तसम्मको गर्दा पनि विशेष महाधिवेशन आह्वानकर्ता साथीहरुले पुस मसान्तसम्म भएपनि हुन्छ भनेपनि त्यसलाई हामीले स्विकार गर्छौ भन्ने हिसावले लिनु भयो । किनकी पुस मसान्तसम्मको अवधि विशेष महाधिवेशनको बाध्यकारी समय थियो । अहिले पत्रमा नै तपाईहरुले भनिसक्नुभएको छ–यसको बारेमा मैले अहिले धेरै टिप्पणी गर्न मिल्दैन । तर यति कुरा भन्छु कि–विशेष महाधिवेशन पुस मसान्त भित्र अनिवार्य गर्नुपर्ने कुरा यो अव नेपाली काँग्रेस पार्टीको केन्द्रिय कार्य समितिको अनिवार्य जिम्मेवारी भित्र पर्छ । यो हाम्रा निम्ति पनि अव ऐच्छिक विषय रहेन । कि हामीले यो भन्दा अगाडि नै अधिवेशन गरिसक्नु पर्दथ्यो । १५ औ महाधिवेशन सम्पन्न गरेको भए आफै यो मागको सार्थकता सकिन्थ्यो । १५ औ महाधिवेशन यो बीचमा गर्न नसक्ने अवस्था बनेकोमा विशेष महाधिवेशनको तपाईहरुको माग सम्बोधन गर्नु अनिवार्य हुन्छ । यो ऐच्छिक विषय रहदैरहँदैन ।’
महामन्त्री थापाले १५ औं महाधिवेशन पुस समान्त भित्र गरिसक्नुपर्ने भएकाले पनि विशेष महाधिवेशन पक्षधरको माग सम्बोधन गर्ने पार्टीको जिम्मेवारी भएको तर्क पनि गर्नुभयो ।
