काठमाडौँ । नेपाली काँग्रेसका सांसद नारायणप्रकाश साउदले देशभरका कारागारहरुको अवस्था सुधार गर्न जरुरी रहेको बताउनुभएको छ ।
प्रतिनिधि सभाको बिहीवारको बैठकमा बोल्दै सांसद साउदले यस्तो बताउनुभएको हो । नेपाल सरकारले कारागार व्यवस्थापनका लागि केही सुधारात्मक कार्यक्रम ल्याएको भएपनि प्रभावकारी नदेखिएको उहाँको भनाइ छ । उहाँले कारागारलाई दण्डको थलो मात्र नभई सुधार र पुनःस्थापनाको केन्द्रको रुपमा हेर्ने अन्तर्राष्ट्रिय अभ्यासलाई अंगिकार गर्नुपर्ने धारणा राख्नु भयो । उहाँले संयुक्त राष्ट्रसंघ तथा अन्तरराष्ट्रिय न्यायालयले कैदिबन्दीलाई यातनारहित वातावरण, न्यायोचित व्यवहार, स्वास्थ्य, शिक्षा र पुनःस्थापनको अधिकार सुनिश्चि गर्नुपर्ने व्यवस्था गरेको उल्लेख गर्दै उक्त विषय कार्यान्वयनका लागि सरकार बाध्य र प्रतिवद्ध रहेको बताउनु भयो ।
उहाँले भन्नुभयो, ‘नेपाल सरकारले केही सुधारात्मक कार्यक्रम ल्याएपनि ति प्रभावकारी देखिएका छैनन् । अन्तर्राष्ट्रिय अभ्यासमा कारागारलाई दण्डको मात्र थलो नभई सुधार र पुनःस्थापनको केन्द्रको रुपमा हेर्ने प्रचलन छ । संयुक्त राष्ट्रसंघको मानव अधिकार उचायुक्तको कार्यालयको मापदण्डअनुसार तथा अन्तर्राष्ट्रिय न्यायालयले कैदिबन्दीलाई यातनारहित वातावरण, न्यायोचित व्यवहार, स्वास्थ्य, शिक्षा र पुनःस्थापनको अधिकार सुनिश्चित गर्नुपर्ने व्यवस्था गरेको छ । नेपाल यीमध्ये धेरै सन्धिहरुको पक्षराष्ट्र भएकोले कानूनी रुपमा प्रतिवद्ध र बाध्य छ ।’
कारागार ऐनमा व्यवस्था भएअनुरुप आवश्यक पूर्वाधार निर्माणमा जोड दिन सांसद साउदले सरकारको ध्यानाकर्षण गराउनु भयो ।
