काठमाडौँ । पाँचौं टी–२० खेलमा अष्ट्रेलियाले वेस्ट इन्डिजलाई ३ विकेटले पराजित गर्दै शृङ्खला ५–० ले क्लिन स्वीप गरेको छ ।
बासेटेरेमा खेलिएको पाँचौं तथा अन्तिम खेलमा टिम डेभिड, मिचेल ओवेन र क्यामरुन ग्रिनको उत्कृष्ट ब्याटिङका कारण अष्ट्रेलियाले जित हासिल गरेको हो ।
पहिले ब्याटिङ गरेको वेस्ट इन्डिजले १९.४ ओभरमा १७० रन बनाएको थियो । जवाफमा अष्ट्रेलियाले १६ ओभरमा ७ विकेट गुमाउँदै १७३ रन बनाएर लक्ष्य हासिल गर्यो ।
टस हारेर ब्याटिमा उत्रिएको वेस्ट इन्डिजको सुरुवात खराब रह्यो । ओपनर शाई होप १४ रनमा आउट भए । त्यसपछि दोस्रो ओपनर ब्रान्डन किङ २२ रनमा पभेलियन फर्किए । पावरप्लेमा वेस्ट इन्डिजले ३ विकेट गुमाएपछि ४९ रन बनाएको थियो । १० ओभर (ड्रिंक्स)सम्मको स्कोर ४ विकेटमा ८४ रन थियो ।
शिमरोन हेटमायरले उत्कृष्ट ब्याटिङ गर्दै तीन महत्वपूर्ण साझेदारी गरे । पहिलो, उनले शेर्फेन रदरफोर्डसँग चौथो विकेटको लागि १८ बलमा ३२ रन जोडे ।
यसपछि उनले जेसन होल्डरसँग पाँचौं विकेटको लागि ३० बलमा ४७ रन र सातौं विकेटको लागि १५ बलमा ३२ रनको साझेदारी गरे ।
यी साझेदारीका कारण वेस्ट इन्डिजको स्कोर १७० पुग्यो । हेटमायरले ३१ बलमा ५२ रन, रुदरफोर्डले १८ बलमा ३५ र होल्डरले १५ बलमा २० रन बनाए ।
अस्ट्रेलियाका लागि बेन द्वारशुइसले ४ ओभरमा ४१ रन दिँदै ३ विकेट र नाथन एलिसले ३.२ ओभरमा ३२ रन दिँदै २ विकेट लिए ।
१७१ रनको लक्ष्य पछ्याउने क्रममा अस्ट्रेलियाको सुरुवात राम्रो भएन । ओपनर ग्लेन म्याक्सवेल १२ रनमा आउट भए । जोश इङ्लिस २३ रन र मिचेल मार्श २५ रनमा पभेलियन फर्किए । अस्ट्रेलियाले पावरप्लेमा ४ विकेट गुमाउँदै ६७ रन बनाएको थियो ।
क्यामरुन ग्रिनले अष्ट्रेलियाली इनिङ्सको जिम्मेवारी सम्हाले र टोलीलाई जितको सँघारमा पुर्याए । उनले टिम डेभिडसँग चौथो विकेटको लागि १४ बलमा ३५ रन र मिचेल ओवेनसँग पाँचौं विकेटको लागि २९ बलमा ६३ रनको साझेदारी गरे ।
ग्रिनले १८ बलमा ३२ रन, डेभिडले १२ बलमा ३० र ओवेनले १७ बलमा ३७ रन बनाए ।
वेस्ट इन्डिजका लागि अकिल हुसेनले ४ ओभरमा १७ रन दिँदै ३ विकेट, जेसन होल्डरले ३ ओभरमा ३६ रन दिँदै २ विकेट र अल्जारी जोसेफले २.१ ओभरमा २१ रन दिँदै २ विकेट लिए ।
