काठमाडौँँ । नेपाल सुपर लिग (एनएसएल) टोलि
एफसी चितवनले रेफ्रीको स्तर समयमै सुधार नगरे प्रतियोगिता नखेल्ने चेतावनी दिएको छ ।
चितवनका सिइओ सचिन ढकालले एक वक्तव्य निकाल्दै आफ्नो विपक्षमा बारम्बार विवादास्पद निर्णय गरेको भन्दै आपत्ति जनाएका हुन् ।
चितवन काठमाडौं रेजर्ससँग सोमबार २–० ले पराजित भएको थियो । एक खेल खेल्न बाँकी रहेको चितवन सात अंकसहित तालिकाको चौथो स्थानमा छ । अब चितवनलाई आफ्नो अन्तिम खेलमा धनगढी एफसीविरुद्ध जित्नैपर्ने दबाब छ ।
यस्तो अवस्थामा समयमै रेफ्रीको स्तर सुधार र उत्तरदायित्व स्थापित गरिएन भने क्लबको प्राथमिकता अब ग्ल्यामरभन्दा टाढा बाल फुटबल र दीर्घकालीन ग्रासरुट विकासमा केन्द्रित हुने चेतावनी दिएका छन् ।
उनले भनेका छन्:
नेपाली फुटबलको समग्र विकास र व्यवसायीकरणको लागि समर्पित रही कार्यरत एफसी चितवन गम्भीर रूपमा एउटा गुनासो सार्वजनिक गर्न बाध्य भएको छ।
हालैको एक खेलमा चौथो रेफ्रीले झापा एफसीका पक्षमा गोप्य रूपमा पेनाल्टीको संकेत गरेको स्पष्ट देखिएपछि, क्लबले सो व्यक्ति रेफ्रीको रूपमा आगामी खेलमा नआउन् भन्ने औपचारिक अनुरोध गरेको थियो। तर दुर्भाग्यवश, उक्त रेफ्रीलाई पुनस् सोही खेलमा मुख्य रेफ्री र चौथो रेफ्रीको रूपमा नियुक्त गरिएको छ।
यो घटनाले मात्र होइन, विगतका विभिन्न खेलहरूमा पनि बारम्बार विवादास्पद निर्णयहरू आइरहेका छन्—जुन निर्णयहरू प्रायः एकतर्फी, अस्पष्ट र फुटबलको मर्मविपरीत देखिन्छन्। यस्ता निर्णयहरूले करोडौं रुपैयाँको लगानी, खेलाडीहरूको मेहनत, र समर्थकहरूको भावना माथि प्रश्नचिन्ह खडा गरेको छ।
एफसी चितवनले विश्वस्तरीय खेलाडीहरू ल्याएर नेपाली लिगलाई अन्तर्राष्ट्रिय स्तरमा पुर्याउने प्रयास गरिरहेको छ। तर यदि निर्णायक तहमै निष्पक्षता र क्षमताको कमी रहिरह्यो भने, यस्ता प्रयासहरू निरर्थक बन्न सक्छन्।
हाम्रो स्पष्ट माग छ—या त रेफ्रीहरूको स्तर तत्काल सुधार गरियोस्, वा विदेशी रेफ्रीहरूको व्यवस्था गरियोस्, जसले निष्पक्षता कायम राख्न सकून्।
नेपालको रेफ्री प्रणालीप्रति अघिल्ला विवादहरू र वर्तमान अवस्था हेर्दा, यो अवस्था लगानीकर्ताहरूका लागि निराशाजनक मात्र होइन, अति असह्य पनि बन्न थालेको छ।
यदि समयमै सुधार र उत्तरदायित्व स्थापित गरिएन भने, क्लबको प्राथमिकता अब ग्ल्यामरभन्दा टाढा—बाल फुटबल र दीर्घकालीन ग्रासरुट विकासमा केन्द्रित हुनेछ।
हामी नेपाली फुटबलप्रति समर्पित छौं। तर समर्पणको मूल्य निष्पक्षता, पारदर्शिता र सम्मानले चुकाउनु पर्छ।
