काठमाडौँ । राष्ट्रिय स्वतन्त्र पार्टी (रास्वपा)का सांसद डोरप्रसाद अर्यालले श्रमिकहरुको अवस्था बुझेर सम्झौताअनुसारकै सेवासुविधा दिलाउन सरकारसँग माग गरेका छन् ।
प्रतिनिधिसभाको बैठकमा बोल्दै सांसद अर्यालले श्रमिकहरुको अवस्था बुझेर सम्झौताअनुसारकै सेवासुविधा दिलाउन र श्रमिकलाई दुःख दिने म्यानपावरलाई कारबाहीको दायरामा ल्याउन श्रम मन्त्रालयको ध्यानाकर्षण गराएका हुन् ।
उनले भने‘ हालै यूएई र मलेसियाका सेक्युरिटी कम्पनीमा कार्यरत श्रमिकहरुले सम्झौताअनुसार पारिश्रमिक, बिदा र औषधि उपचार नपाएको गुनासो हामीमाझ गर्नुभएको छ। यता म्यानपावरले मोटो रकम असुल्ने र भनेजस्तो काम नदिएको गुनासो गर्दा श्रमिकलाई थर्काउने, धम्क्याउने गरेको उनिहरु बताउछन् । त्यसैले नेपाली श्रमिकहरुको अवस्था बुझेर सम्झौताअनुसारकै सेवासुविधा दिलाउन र श्रमिकलाई दुःख दिने म्यानपावरलाई कारबाहीको दायरामा ल्याउन म सभामुखज्यु मार्फत् श्रम मन्त्रालयको ध्यानाकर्षण गराउँछु ।’
साथै सांसद अर्यालले विदेशमा नेपालीहरूले पसिना बगाएर पठाएको रेमिट्यान्सले अर्थतन्त्रलाई टेको दिएको तर, उनीहरूको पीडा भने सरकारले बुझ्न नसकेको पनि गुनासो गरे ।
उनले भने ‘विदेशमा नेपालीहरूले पसिना बगाएर पठाएको रेमिट्यान्सले हाम्रो अर्थतन्त्रलाई टेको दिएको विदितै छ। तर, उनीहरूको पीडा भने हामीले बुझ्न सकेका छैनौँ। दैनिकजसो मेरो सचिवालयमा अलपत्र परेको, ठगिएको, समस्या राख्दा दूतावास र वैदेशिक रोजगार विभागले बेवास्ता गरेको गुनासा आउने गरेका छन् ।’
साथै सांसद अर्यालले कञ्चनपुरको लालझाडी ३ का झण्डै डेढ लाख जनसंख्या दोदा नदीमा आउने बाढीको उच्च जोखिममा रहेको जनाउँदै बर्खायाम नजिकिएकाले जतिसक्दो चाँडो सो नदीमा तटबन्ध गर्न सरकारको ध्यानाकर्षण पनि गराएका छन् ।
