काठमाडाैँ । राष्ट्रिय स्वतन्त्र पार्टी (रास्वपा) का सांसद सागर ढकालले मानव–वन्यजन्तु द्वन्द्व न्यूनीकरणका लागि विज्ञ टोलीले तयार पारेको प्रतिवेदन तत्काल कार्यान्वयनमा लैजान सरकारसँग माग गर्नुभएको छ ।
सोमबार प्रतिनिधिसभा अन्तर्गतको कृषि तथा प्राकृतिक स्रोत समितिको बैठकमा बोल्दै सांसद ढकालले वन्यजन्तुको आक्रमणबाट मानवीय क्षति बढ्दै गएको भन्दै समस्या समाधानलाई सरकारले उच्च प्राथमिकतामा राख्नुपर्ने बताउनुभयो ।
उहाँले बाँदर, बँदेल, हात्ती र नीलगाईलगायत वन्यजन्तुबाट हुने क्षति र त्यसको समाधानका उपाय समेटिएको विज्ञ टोलीको विस्तृत प्रतिवेदनलाई ‘ऐतिहासिक’ संज्ञा दिँदै तत्काल कार्यान्वयनमा लैजानुपर्नेमा जोड दिनुभयो ।
सांसद ढकालले प्रतिवेदनमा समेटिएको ‘हेरालो प्रणाली’लाई प्रभावकारी बनाउन पूर्वप्रहरी तथा पूर्वसैनिकलाई परिचालन गर्न सुझाव दिनुभयो । पूर्वसुरक्षाकर्मीहरू तालिमप्राप्त हुने भएकाले उनीहरूलाई सङ्गठित रूपमा जिम्मेवारी दिँदा वन्यजन्तुबाट हुने क्षति न्यूनीकरणमा प्रभावकारी परिणाम हासिल गर्न सकिने उहाँको भनाइ छ ।
वन्यजन्तुको प्रतिकारका क्रममा हुनसक्ने जोखिमलाई ध्यानमा राख्दै हेरालोका रूपमा परिचालन हुने व्यक्तिका लागि आवश्यक आत्मरक्षा सामग्री (सेफ्टी गियर) को व्यवस्था गर्नुपर्ने पनि उहाँले बताउनुभयो ।
गुल्मीमा हालै वन्यजन्तुको आक्रमणबाट दुई जनाको मृत्यु भएको घटनालाई स्मरण गर्दै सांसद ढकालले मानव–वन्यजन्तु सहअस्तित्वको चर्चा भइरहे पनि मानिस नै असुरक्षित हुने अवस्था सिर्जना भएको बताउनुभयो ।
उहाँले भन्नुभयो, “मानव र वन्यजन्तुको सहअस्तित्वको चर्चा गरिरहँदा अहिले मानिस नै असुरक्षित हुने अवस्था सिर्जना भएको छ । त्यसैले यो प्रतिवेदनलाई ढिलाइ नगरी भोलि नै सम्बन्धित मन्त्रीलाई बुझाएर बजेट व्यवस्थापनका लागि अर्थ मन्त्रालयसँग समन्वय गर्नुपर्छ ।”
सांसद ढकालले प्रतिवेदन मन्त्रालयमा बुझाएर मात्र सीमित नराखी प्रत्येक पालिका तहसम्म पुर्याउनुपर्नेमा जोड दिनुभयो । आवश्यक बजेट व्यवस्थापनका लागि संसद्का अन्य सदस्यहरूसँग समेत समन्वय गरी आफूले पहल गर्ने प्रतिबद्धता उहाँले व्यक्त गर्नुभयो ।
