काठमाडौं । नेपाल प्रिमियर लिग (एनपीएल)को प्रत्यक्ष प्रसारण स्टार स्पोर्ट्समार्फत गराउने तयारी भइरहेको छ ।
क्यान स्रोतका अनुसार एनपीएलको कमर्सियल पार्टनर ब्रान्ड लोजिकले ब्रोडकास्टिङ राइट्सका लागि स्टार स्पोर्ट्ससँग छलफल गरिरहेको छ । ब्रोडकास्टिङको लागि अन्तिम चरणको कुराकानी भइरहेको स्रोतले जनायो ।
ब्राण्ड लजिकका प्रमुख कार्यकारी अधिकारी रोशन निरौलाले पनि एनपीएलको प्रसारण अधिकारका लागि स्टार स्पोर्ट्ससँग छलफल भईरहेको जनाएका छन् । उनले स्टार स्पोर्ट्ससँगको छलफल अहिले अन्तिम चरणमा पुगेको र छिट्टै सकारात्मक नतिजा सार्वजनिक गर्ने जनाएका छन् ।
नेपालमा पहिलो पटक हुन लागेको फ्रेन्चायज क्रिकेट लिग एनपीएल आगामी मंसिर १५ देखि पुस ६ सम्म आयोजना हुँदैछ । एनपीएलमा कर्णाली याक, विराटनगर, जनकपुर, चितवन, काठमाडौं, पोखरा, लुम्बिनी र सुदूरपश्चिम गरी ८ टिम सहभागी छन् ।
