काठमाडौं । प्रधानमन्त्री केपी शर्मा ओलीले पहिलाकै दरमा भाडा लिएर सहयोग गर्न आग्रह गर्नुभएको छ ।
हवाई भाडा अरु बेला भन्दा महँगो भएको गुनासो सामाजिक सञ्जालमा सुनिएको भन्दै प्रधानमन्त्री ओलीले सामाजिक सञ्जालबाट यस्तो आग्रह गर्नुभएको हो ।
लगातारको वर्षा र बाढी पहिरोले सडक यातायात अवरुद्ध हुँदा अत्यावश्यक यात्रामा पनि अप्ठेरो परेको उहाँले बताउनुभयो ।
उहाँले भन्नुभएको छ – ,‘हवाई भाडा अरु बेला भन्दा महँगो भएको गुनासो सामाजिक सञ्जालमा सुनिएको छ, हवाई सेवा दिँदै आएका एयरलाइन्सहरूलाई यस्तो विपत्तिको समयमा यात्रुहरूसँग पहिले भन्दा सहुलियत मूल्यमा या पहिलाकै दरमा भाडा लिएर सहयोग गर्नुहुन अनुरोध छ ।’
नेपाल सरकार पर्यटन मन्त्रालयले पनि हवाई यात्रुको लागि र उद्धार उडानको लागि विशेष निर्णय गरेको जानकारी दिँदै उहाँले भन्नुभयो ‘हामीमाथि परेको प्राकृतिक विपत्ति हामी सबै मिलेर सामना गर्नुपर्छ ।,’
प्रधानमन्त्री ओली हाल राष्ट्र सघंको ७९ औँ महासभामा भाग लिन अमेरिकामा हुनुहुन्छ । उहाँ भोलि नेपाल फर्किने कार्यतालिका छ ।
