काठमाडौं । नेकपा एमालेका केन्द्रीय सदस्य एवं विदेश विभागका सदस्य विष्णु रिजालले सरकारको प्राथमिकता एकातिर हुनुपर्नेमा ध्यान अर्कैतिर केन्द्रित भएको आरोप लगाएका छन् ।
सामाजिक सञ्जालमार्फत धारणा सार्वजनिक गर्दै रिजालले राज्यसँग बल प्रयोग गर्ने अधिकार भए पनि त्यसको जथाभावी प्रयोग गर्दा राज्य आतंकको अवस्था सिर्जना भएको बताएका हुन् ।
उनले फरक पार्टीका नेतामाथि धरपकड, व्यवसायीमाथि आतंक, सञ्चारमाध्यमलाई आर्थिक नाकाबन्दी र भौतिक त्रास देखाउने काम भइरहेको आरोप लगाए । आफ्नै पार्टीका नेतामाथिसमेत निगरानी भइरहेको समाचार सार्वजनिक हुन थालेको भन्दै उनले सरकारको कार्यशैलीप्रति प्रश्न उठाएका छन् ।
रिजालले लेखेका छन्, ‘फरक पार्टीका नेताहरूमाथि धरपकड, व्यवसायीमाथि आतंक, मिडियालाई आर्थिक नाकाबन्दी लगाउँदा नपुगेर भौतिक त्रास, हुँदाहुँदा आफ्नै पार्टीका नेतामाथि निगरानीका समाचार सार्वजनिक भएका छन् । मुलुक कता जाँदैछ ? कता लैजान खोजिँदैछ ? हामीकहाँ भनाइ नै छ नि, अति गरे खति हुन्छ ।’
उनले सरकारले प्राथमिकतामा राख्नुपर्ने विषयमा पुँजी बजारको निरन्तर गिरावट, विदेशस्थित नेपाली दूतावासहरू लामो समयदेखि रिक्त रहनु, विश्वविद्यालयको अस्तव्यस्तता र वैदेशिक सहायता रोकिएको विषयलाई औँल्याएका छन् ।
त्यस्तै, विदेशी लगानी शून्य अवस्थामा पुगेको, विदेश सम्बन्ध शिथिल बनेको, अर्थतन्त्र ओरालो लागेको र सामाजिक सद्भावमा समेत समस्या देखिएको रिजालको दाबी छ ।
यी विषयमा सरकारको ध्यान जानुपर्नेमा अन्यत्रै केन्द्रित भएको टिप्पणी गर्दै उनले भनेका छन्, ‘सरकारको ध्यानचाहिँ अन्यत्रै छ । भन्छन् नि, टकिङ टु टोकियो, लुकिङ टु लण्डन ।’
