सिंहदरबारस्थित मन्त्रालयमा अपराह्न ३ बजे हुने अन्तरक्रियामा सूचना प्रवाहमा देखिएका समस्या तथा चुनौती, नीतिगत सुधार र सरकार तथा सञ्चारमाध्यमबीचको समन्वयलाई थप प्रभावकारी बनाउने विषयमा छलफल हुने मन्त्रालयले जनाएको छ ।
अन्तरक्रियामा सरकारी सूचना प्रवाहलाई व्यवस्थित, पारदर्शी र प्रभावकारी बनाउने उपायका साथै समाचार सम्प्रेषणका क्रममा पत्रकारहरूले भोग्दै आएका समस्या र चुनौतीबारे पनि छलफल हुनेछ । त्यस्तै, सूचना प्रवाहलाई सहज, विश्वसनीय र प्रभावकारी बनाउने विषयमा सहभागीबीच विचार आदानप्रदान गरिनेछ ।
मन्त्रालयका अनुसार अन्तरक्रियामा विभिन्न सञ्चारमाध्यममा राजनीतिक बिट हेर्ने पत्रकारहरूलाई आमन्त्रण गरिएको छ ।
मन्त्री पोखरेलले पछिल्लो समय शिक्षा तथा सञ्चार क्षेत्रसँग सम्बन्धित सरोकारवाला, सञ्चारमाध्यम, शिक्षा तथा राजनीतिक बिटका पत्रकार, शैक्षिक संस्था र निजी क्षेत्रका प्रतिनिधिसँग निरन्तर संवाद गर्दै आउनुभएको छ । यस्ता संवादबाट प्राप्त सुझावका आधारमा नीतिगत सुधार, पारदर्शिता र प्रभावकारी समन्वयलाई प्राथमिकता दिइएको मन्त्रालयको भनाइ छ ।
मन्त्रालयले सरकार र सञ्चारमाध्यमबीचको संवाद तथा सहकार्यलाई थप सुदृढ बनाउन अन्तरक्रिया महत्वपूर्ण हुने विश्वास व्यक्त गरेको छ।
