एजेन्सी । श्रीलंकाका नवनिर्वाचित राष्ट्रपति अनुरा कुमारा दिसानायकेले बुधबार देशको संसद विघटन गरेका छन् । यो आदेश आज राति १२ बजेदेखि लागू हुनेछ । उनले नोभेम्बर १४ मा निर्वाचन गर्ने घोषणा पनि गरेका छन् ।
संसदको कार्यकाल अगस्ट २०२५ सम्म थियो । तर अनुरा दिसानायकेले चुनावी प्रचारका क्रममा ४५ दिनभित्र संसद विघटन गर्ने वाचा गरेकाले ११ महिनाअघि नै विघटन गर्ने निर्णय गरिएको हो । राष्ट्रपति दिसानायकेले आगामी नोभेम्बर २१ मा संसदको बैठक बोलाउने बताए ।
श्रीलंकाको संसदमा कुल २२५ सीटहरू छन् । तर, अनुरा कुमारा दिसानायकेको गठबन्धन नेशनल पिपुल्स पार्टीसँग आफ्नो नीति कार्यान्वयन गर्न संसदमा बहुमत सांसद हुनु जरुरी छ । त्यसैले उनले संसद विघटन गर्ने निर्णय गरे ।
श्रीलंकामा पनि हरेक पाँच वर्षमा संसदीय चुनाव हुन्छ । पछिल्लो चुनाव २०२० मा भएको थियो ।
राष्ट्रपति अनुरा कुमार दिसानायकेले हरिणी अमरसूर्यालाई देशको नयाँ प्रधानमन्त्रीमा नियुक्त गरेका छन् । मंगलबार उनले पद तथा गोपनियताको सपथ लिइन् । पहिलो पटक सांसद बनेकी हरिणी श्रीलंकाकी तेस्रो महिला प्रधानमन्त्री हुन् ।
