काठमाडौँ । थाईल्यान्डमा एक सांसदले पत्रकारलाई थप्पड हानेपछि त्यसबारे छानबिन गर्न संसद्लाई अनुरोध गरिएको छ ।
पलाङ प्रचारात पार्टी (पीपीआरपी)का सांसद प्रवित वोङ्सुवान पूर्वसेनापति पनि हुन् । गत साता उनले संसद्मा नयाँ प्रधानमन्त्री छान्ने प्रक्रियाबारे प्रश्न सोधेकी थाईपीबीएसकी एक संवाददाताको टाउकोमा थप्पड हानेका थिए ।
पीपीआरपीका एक प्रवक्ताका अनुसार प्रवित र ती पत्रकारबीच राम्रो चिनजान थियो अनि उनले “निकटस्थ व्यक्ति ठानेर उनलाई त्यसरी जिस्क्याएको” भन्दै क्षमायाचना गरिसकेका छन् ।
थाईपीबीएसले पत्रकारलाई धम्क्याउने प्रयासका लागि प्रवित उत्तरदायी हुनुपर्ने जनाएको छ ।
थाई पत्रकार र प्रसारकका संस्थाहरूले प्रवितको गतिविधि सांसदको आचरणविपरीत भएको भन्दै छानबिनका लागि अनुरोध गरेर संसद्का सभामुखलाई एउटा पत्र बुझाएका छन् । बीबीसीबाट साभार
