काठमाडौँ । आईपीएल–२०२४ को उपाधि कोलकाता नाइट राइडर्स (केकेआर)ले जितेको छ । आइतबार फाइनल खेलमा सनराइजर्स हैदरावाद (एसआरएच) लाई ८ विकेटले पराजित गर्दै कोलकाता च्याम्पियन बनेको हो ।
कोलकाताको यो समग्रमा तेस्रो उपाधि हो । टोलीले १० वर्षपछि उपाधि जितेको हो । पछिल्लो पटक कोलकाता सन् २०१४ मा च्याम्पियन बनेको थियो ।
चेपौक मैदानमा टस जितेर ब्याटिङ रोजेको हैदरावाद १८.३ ओभरमा ११३ रनमा अलआउट भयो । यो आईपीएल फाइनलको सबैभन्दा कम स्कोर हो ।
कोलकाताले १०.३ ओभरमा २ विकेटको क्षतिमा लक्ष्य पूरा गर्यो । यो आईपीएल फाइनलको सबैभन्दा छिटो रन चेज हो । फाइनलको प्लेयर अफ दि मिचेल स्टार्क भए । उनले २ विकेट लिएका थिए भने २ क्याच पनि लिएका थिए ।
कप्तान प्याट कमिन्सले सर्वाधिक २४ रन बनाए भने एडेन मार्करामले २० रनको इनिङ खेले । अभिषेक शर्मा २, ट्राभिस हेड ० र राहुल त्रिपाठी ९ रनमा आउट भए । नितिश रेड्डी १३ रन र हेनरिक क्लासेन १६ रन बनाएर प्याभिलियन फर्किए ।
कोलकाताका आन्द्रे रसेलले ३ विकेट लिए । मिचेल स्टार्क र हर्षित रानाले २–२ विकेट लिए । वैभव अरोडा, वरुण चक्रवर्ती र सुनील नारायणले १–१ विकेट लिए ।
जवाफी इनिङ्समा कोलकाताका वेंकटेश अय्यरले २६ बलमा ५२ रनको अविजित अर्धशतक खेले । रहमानउल्लाह गुरबाजले ३२ बलमा ३९ रन बनाए । हैदरवादका प्याट कमिन्स र शाहबाज अहमदले एकएक विकेट लिए ।
